काठमाडौं, मंसिर ६ । भोलि मंसिर ७ गते अर्थात शुक्रबारदेखि प्रदर्शनमा आउने नयाँ नेपाली फिल्म ‘तेल भिसा’ को अग्रीम बुकिङ खुला गरिएको छ ।
शंकर घिमिरेले १२ पछि निर्देशनमा कमव्याक गरेको यो फिल्मले देशभरका सिंगलस्क्रिनदेखि मल्टीप्लेक्ससम्म राम्रो शो पाएको छ । फिल्मको अग्रीम टिकट बुकिङ पनि राम्रो देखिएको छ ।
देशकै ठूलो मल्टीप्लेक्स चेन क्युएफएक्सले काठमाडौं उपत्यकामा २५ शो तथा मोफसलमा पनि २५ शो उपलब्ध गराएको छ । यस्तै, देशको दोस्रो ठुलो मल्टीप्लेक्स चेन आइएनआई सिनेमाजले ९ शो, वान सिनेमाजले ७ शो, एफक्युबले ६ शो, बिग मूभिजले ४ शो, बिएसआर मूभिजले ३ शो, रञ्जना सिनेप्लेक्सले ५ शो, सिके सिनेमाजले ३ शो, सिने डी सेफले ४ शो र कीर्तिपुर सिनेप्लेक्सले १ शो उपलब्ध गराएका छन् ।
यो फिल्मले देशभरका सिनेमा हलमा डेढ सय हाराहारीमा शो पाएको देखिन्छ । यो नेपाली फिल्मका लागि उपलब्ध राम्रो शो हो । यी मात्रै शोमा दर्शकको अकुपेन्सी आक्रामक देखिएमा एक करोड रुपैयाँ बढी ओपनिङ कलेक्सन हुने गर्छ । त्यसपछि फिल्मले दर्शकबाट उत्कृष्ट वर्डअफ माउथ पाएको खण्डमा शो बढ्दै जाने हल सञ्चालक तथा वितरकको भनाई छ । अझै केही हलरुमा अग्रीम टिकट बुकिङ खुल्ने क्रम जारी छ ।
शंकर घिमिरेको लेखन तथा निर्देशनमा निर्माण भएको यो फिल्ममा अभिनेता विपिन कार्कीलाई बुवा तथा छोरागरी दोहोरो भूमिका हेर्न पाइनेछ । यो फिल्ममा विपिनसँगै वर्षा राउत, पुजा चन्द, ऋचा घिमिरे, बुद्धि तामाङ, सुचित्रा उप्रेती र विदेशी कलाकारहरुको अभिनय रहेको छ ।
वेलडन क्रियसनको व्यानरमा ऋचा घिमिरेको प्रस्तुति रहेको यो फिल्ममा अनिल पाण्डे र शिवराज कार्कीको लगानी छ । प्रिन्स युवराज कार्की र श्रुती दाहाल कार्यकारी निर्माता रहेको फिल्ममा सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्धाजको संगीत र अजय खड्काको सम्पादन छ ।
प्रतिकृया दिनुहोस
