काठमाडौं, कार्तिक १२ । अन्तर्राष्ट्रिय बजारमा कच्चा तेलको भाउमा भारी गिरावट आएको छ । सोमबार यो समाचार तयार पार्दै गर्दा (११ बजेर ५३ मिनेट) ब्रेन्ट क्रुड आयलको भाउ ४.५२ प्रतिशतले घटेर ७२.६१ डलरमा झरेको आयल प्राइसले जनाएको छ । यता, क्रुड आयल (डब्लुटीआइ) पनि ४.६८ प्रतिशतले घटेर ६८.४२ डलरमा झरेको छ ।
इजरायलले इरानमाथि गरेको प्रतिशोधात्मक आक्रमणले तेहरानको तेल र आणविक संरचनाहरुलाई असर नगरेपछि मध्यपूर्वमा भू-राजनीतिक तनाव केही कम भएको रोयटर्सले जनाएको छ । यसले विश्व तेल आपूर्तिमा सम्भावित अवरोधहरुको डरलाई कम गरिदिएको छ ।
अन्तर्राष्ट्रिय ऊर्जा एजेन्सीले पनि बजारलाई प्रभाव पार्दै विश्वव्यापी तेल माग वृद्धिमा कम्जोरीको भविष्यवाणी गरेको छ । मुख्यतया चीनबाट आएको मागमा गिरावटका कारण माग घट्ने अपेक्षाले तेलको मूल्यमा थप दबाब सिर्जना गरेको छ । यद्दपि भू-राजनीतिक तनाव कम भएको देखिन्छ, विश्व तेल बजारले अझै पनि मागको अनिश्चितता र आपूर्तिमा थप अवरोधहरुको सम्भावना जस्ता चुनौतीहरुलाई सामना गरिरहेको छ ।
