काठमाडौं, असोज २१ । सिंहदरबार प्रवेश गर्न चाहने नागरिकका लागि सरकारले स्मार्ट गेट पास सिस्टम सञ्चालनमा ल्याएको छ । विभिन्न काम विशेषले देशको प्रशासनिक केन्द्रको रूपमा रहेको सिंहदरबार प्रवेश गर्दा नागरिकले गेट पासको नाममा खेप्दै आएको सास्ती दूर गर्न यस्तो व्यवस्था मिलाइएको हो ।
गेट पासका लागि छुट्टै वेबसाइट नै तयार पारिएको छ । सिंहदरबार प्रवेश गर्नका लागि आवश्यक पर्ने गेट पास लिन चाहनेहरूले सिंहदरबारपास डट जीओभी डट एनपीमा गएर अथवा यहाँ क्लिक गरेर रजिस्ट्रेसन गर्नुपर्ने अर्थात् अकाउन्ट खोल्नु पर्ने हुन्छ ।
यसका लागि मोबाइल नम्बर, ईमेल, नाम, ठेगाना, परिचयपत्र र त्यसको नम्बर उल्लेख गरेर पासवर्ड अनिवार्य रूपमा समावेश गर्नु पर्ने हुन्छ । त्यसपछि साइट लगइन गर्नु भयो भने बायाँ तर्फ ‘कार्यालय भ्रमण अनुरोध’ अन्तर्गत अनुरोध फाराममा जानु होस् ।
त्यसपछि खुल्ने फाराममा जान चाहेको कार्यालय, मिति, समय, सवारी साधन भए नभएको, साथमा थप व्यक्ति भए नभएको र भेट्नुपर्ने उद्देश्य खुलाएर बुझाउनु पर्ने हुन्छ । अनलाइनबाट गेट पासका लागि अनुरोध गरिसकेपछि सोही वेबसाइट बाटै गेट पास स्वीकृत भए नभएको समेत थाहा पाउन सकिन्छ ।
यसअघि गेट पासका लागि गेट बाहिर घण्टौंसम्म कुर्नुपर्ने, मन्त्रालयका कर्मचारीहरूलाई हारगुहार गर्नु पर्ने, भनसुन गर्नुपर्ने बाध्यता रहेको थियो । अब भने यो स्मार्ट गेट पास सिस्टमले त्यस खाले झन्झटलाई हटाउने अपेक्षा गरिएको छ । यो सुविधा नागरिक एपमा समेत चाँडै उपलब्ध हुने बताइएको छ ।
Published Date: 07 October 2024
