वीरगन्ज, माघ २२ । पर्साको वीरगन्ज भन्सार नाकाबाट पछिल्लो एक वर्षमा ६५९ विदेशी पर्यटक मात्र नेपाल प्रवेश गरेका छन् । विश्वव्यापी रुपमा फैलिएको कोभिड–१९ को सङ्क्रमणमा कमी आएसँगै नेपाल आउने पर्यटकको सङ्ख्या बढ्दै गएको छ ।
पर्यटन प्रहरी कार्यालय वीरगन्जका अनुसार २०२२ जनवरीदेखि २०२३ जनवरीसम्म वीरगन्ज नाकाबाट ६५९ विदेशी पर्यटक नेपाल प्रवेश गरेका छन् भने ५५० विदेशी पर्यटक बाहिरिएका छन् ।
पर्यटन प्रहरी कार्यालय वीरगन्जका प्रमुख प्रहरी नायब निरीक्षक अनिलकुमार महतोले मौसम र घुमफिरको सिजन उपयुक्त भएकाले कात्तिक, नोभेम्बर, डिसेम्बर र जनवरीमा अन्य महिनाको तुलनामा पर्यटकको चाप बढी हुने बताए ।
कार्यालयको तथ्यांकअनुसार गत महिना मात्रै वीरगन्ज हुँदै १ सय २ विदेशी पर्यटक नेपाल प्रवेश गरेका छन् भने १ सय २४ जना बाहिरिएका छन् । भारतका विभिन्न सहर घुमेर अमेरिका, फ्रान्स, थाइल्याण्ड, जर्मनी, क्यानडालगायतका मुलुकबाट बढी पर्यटक वीरगन्ज नाका हुँदै नेपाल आउने गरेको महतोले बताए ।
वीरगन्ज हुँदै नेपाल आउने पर्यटकलाई असुविधा वा ठगी हुन नदिन जनचेतना जगाउने काम पर्यटक प्रहरी कार्यालय वीरगन्जले गरिरहेको इन्स्पेक्टर महतोले बताए । वीरगन्ज अध्यागमन कार्यालयले भारतको रक्सौल हुँदै वीरगन्ज नाका हुँदै नेपाल प्रवेश गर्ने विदेशी पर्यटकलाई अन अराइभल भिसा जारी गर्छ ।
