काठमाडौं, असार २४ । पाकिस्तानको कराचीस्थित ‘पाकिस्तान स्टक एक्सचेन्ज’ को भवनमा सोमबार आगलागी भएको छ । एक्सचेन्जको चौथो तल्लाबाट आगलागी सुरु भएको थियो भने हाल नियन्त्रणमा आइसकेको छ । आगलागीपछि केही समयका लागि एक्सचेन्जमा सेयर कारोबार रोक्का गरिएको रोयटर्सले उल्लेख गरेको छ । आगलागी सुरु हुनेबित्तिकै भवनबाट कर्मचारीहरुलाई बाहिर निकालिएको थियो ।
यद्दपि, हाल आगलागी नियन्त्रणमा आइसकेको र भवनलाई चिस्याउने काम भइरहेको बताइएको छ । ब्रोकर कम्पनीका कर्मचारीहरु पनि भवन भित्र पुनः प्रवेश गरिसकेका छन् । समयमै आगलागी नियन्त्रण गरिएका कारण कुनै मानवीय क्षति नभएको ‘सिन्ध रेस्क्यू’ का प्रवक्ता हसन खानलाई उद्धृत गर्दै पाकिस्तानी सञ्चार माध्यम डन डट कमले उल्ले गरेको छ ।
पछिल्लो समय पाकिस्तानको सेयर बजार रेकर्ड उच्च विन्दुमा कारोबार हुँदै आएको छ । त्यहाँको ‘केएएसई–१००’ सूचकले हालै मात्र ८० हजार विन्दुको ऐतिहासिक विन्दु पार गरेको थियो ।
