काठमाडौं, असार १२ । जुडो खेलाडी मनिता श्रेष्ठ प्रधानले पेरिस ओलम्पिक–२०२४ खेल्ने भएकी छन् । मनिताले वाईल्ड कार्डमार्फत ओलम्पिक खेल्ने पक्का भएको नेपाल ओलम्पिक कमिटी (एनओसी) ले जनाएको छ । मनिता १२ औं दक्षिण एशियाली खेलकुद (साग) की रजत विजेता विजेता खेलाडी हुन् । उनले ५७ किलोमुनिमा ओलम्पिकमा प्रतिस्पर्धा गर्नेछिन् ।
योसँगै यस पटक पेरिस ओलम्पिकमा भाग लिने नेपाली खेलाडीको संख्या सात७ पुगेको छ । टेबल टेनिसका स्यान्टु श्रेष्ठ ओलम्पिकका लागि छनोट भएका थिए । यसअघि सुटिङ खेलाडी सुष्मिता नेपालले पेरिस ओलम्पिक २०२४ मा भाग लिने निश्चित भएको थियो । छनोट चरण पार गर्न नसक्ने देशका खेलाडीका लागि वाइल्ड कार्डमार्फत सहभागी गराइन्छ ।
पौडीकी डुवाना डुवाना लामा र एलेक्सजेन्डर शाह, एथलेटिक्सकी सन्तोषी श्रेष्ठ र ब्यामिन्टनका प्रिन्स दाहाल युनिभिर्सियालिटी कोटाबाट ओलम्पिक खेल्न लागेका हुन् । ओलम्पिकमा एथलेटिक्स र पौडीमा युनिभर्सियालिटी कोटा हुन्छ ।
काठमाडौं गत महिना भएको दक्षिण एसियाली छनोट चरण पार गर्दै स्यान्टु ओलम्पिकमा छनोट भएका हुन् । छनोट भएर ओलम्पिक खेल्ने स्यान्टु तेस्रो नेपाली खेलाडी हुन् । यसअघि तेक्वान्दोकी संगीना वैद्यले सन् २००४ को एथेन्स ओलम्पिक र तेक्वान्दोकै दिपक विष्टले २००८ को बेजिङ ओलम्पिकमा छनोट पार गरेर भाग लिएका थिए । पेरिस ओलम्पिक जुलाई २६ देखि अगस्ट ११ सम्म हुँदैछ ।
Published Date: 26 June 2024
