सिन्धुली, माघ १७ । डाँका चोरीमा संलग्न रहेको अभियोगमा सिन्धुलीबाट ३ जनालाई प्रहरीले पक्राउ गरेको छ । तिनपाटन गाउँपालिका–८ कटुन्जे बस्ने ७० वर्षीय मंगल बहादुर तामाङको घरमा चोरीमा संलग्न रहेको अभियोगमा ३ जनालाई प्रहरीले पक्राउ गरेको हो ।
पक्राउ पर्नेमा दुधौली नगरपालिका–१० बस्ने ४४ वर्षीय हर्क बहादुर तामाङ, फिक्कल गाउँपालिका–१ बस्ने ३१ वर्षीय रुद्र बहादुर तामाङ र सोही ठाउँ बस्ने ५३ वर्षीय डम्बर बहादुर तामाङ रहेका छन् ।
अपरिचित व्यक्तिले गत पुस २ गते साँझ मंगल बहादुर तामाङ र उनको भान्जी घरमा बसिरहेको अवस्थामा दुवै जनालाई हात खुट्टा बाँधी कुटपिट समेत गरी सुनको रिङ २ थान, फुली, चाँदीका पुराना सिक्का, सुनको मुन्द्रा, तामाको थाल, कचौरा लुटपाट गरी फरार भएका थिए ।
घटनाको आवश्यक अनुसन्धान गर्ने क्रममा जिल्ला प्रहरी कार्यालय सिन्धुली र ईलाका प्रहरी कार्यालय डकाहाबाट खटिएको प्रहरीले डाँका चोरीमा संलग्न उनीहरूलाई पक्राउ गरेको हो ।
साथै चोरी भएको सामानमध्ये बुट्टे कचौरा ३ थान, ढलोटको अम्खरा ३ थान, तामाको ठूलो डबका २ थान र झर्काको थाल २ थान दुधौली नगरपालिका–१० मंगलबारे बस्ने ३५ वर्षीय लाल बहादुर तामाङको घरबाट गत शनिबार प्रहरीले फेला पारी बरामद गरेपछि घटनामा उनीहरुको संलग्नता रहेको खुल्न आएको छ ।
उनीहरु उपर जिल्ला अदालतबाट म्याद अनुमति लिई थप अनुसन्धान भइरहेको सिन्धुली प्रहरीले जनाएको छ ।
