काठमाडौँ, माघ १५ । एनसेलको सेयर बिक्रीबारे छानविन प्रतिवेदन प्रधानमन्त्री पुष्पकमल दाहाल प्रचण्डलाई आज बुझाउने तयारी भएको छ ।
एनसेलको ८० प्रतिशत शेयर खरिद बिक्रीको छानबिन गर्न गठन भएको उच्चस्तरीय छानबिन समितिले प्रतिवेदन तयार पारेर सरकारलाई पेस गर्ने तयारी गरेको हो । डेढ महिनाभन्दा बढी समयमा अनुसन्धान गरेर समितिले तयार पारेको उक्त प्रतिवेदन आजै साँझ प्रधानमन्त्री ‘प्रचण्ड’लाई बुझाउने भएको छ ।
समितिका संयोजक टङ्कमणि शर्माले आज साँझ प्रधानमन्त्रीलाई प्रतिवेदन बुझाउने बताए । उनका अनुसार प्रधानमन्त्री उपत्यका बाहिरबाट फर्केपछि साँझतिर प्रतिवेदन बुझाउने तयारी छ ।
नियामक निकायलाई जानकारी नदिइ आजियाटा ग्रुपले एनसेलको ८० प्रतिशत शेयर शतिसलाल आचार्यको कम्पनी स्पेक्ट्रलाईटलाई बेचेको थियो ।
शेयर खरिद बिक्रीमा विवाद भएपछि सरकारले गत मङ्सिर २१ गते टङ्कमणि शर्माको संयोजकत्वमा ५ सदस्यीय छानबिन समिति गठन गरेको थियो । समितिले पुस २४ गते भित्रमा प्रतिवेदन बुझाउनुपर्ने भएपनि कागजात नआएको भन्दै सरकारसँग १५ दिनको समय माग गरेको थियो ।
