काठमाडौं, माघ १० । आज पनि न्यूरोड क्षेत्रका व्यवसायीहरू आन्दोलित भएका छन् ।
पार्किङ निषेधको विरोधमा उनीहरूले पसल बन्द गरेर बिहान ११ बजेदेखि नै काठमाडौं महानगरपालिका विरोधमा उत्रिएका हुन् ।
धर्मपथ, जुद्ध सालिकदेखि इन्द्रचोक तर्फको सडकखण्ड, खिचापोखरी, महाबौद्ध, वीर अस्पताल वरपरको कालोपत्र सडकमा हिजो माघ ९ गते मंगलवारदेखि महानगरले पार्किङ निषेध गरेको छ ।
स्थानीय सामाजिक संघ-संस्था, व्यवसायिक संघ-संस्था र सरोकारवाला सम्मिलित संघर्ष समिति बनाएर उनीहरूले आन्दोलन गरेका हुन् ।
महानगरले सरोकारवालासँग परामर्श नगरी पार्किङ निषेधको निर्णय गरेको उनीहरूको भनाइ छ ।
पार्किङ हटाउने निर्णयले व्यवसायी, स्थानीय तथा सेवाग्राही अन्यायमा परेको र न्यूरोडको व्यवसायिक भविष्य संकटमा पर्ने उनीहरूको तर्क छ ।
