काठमाडौं, मंसिर १७ । सदाबहार लोकप्रिय गीत ‘तिम्रो मनमा लुकेको कुरा’ को रिमेक गीतको भिडियो सार्वजनिक गरिएको छ । बिहीबार काठमाडौंमा एक कार्यक्रमबीच गीतको भिडियो सार्वजनिक गरिएको हो ।
३३ वर्षअघि निर्माण भएको फिल्म ‘चिनो’ को ‘तिम्रो मनमा लुकेको कुरा’ गीत गायक नारायण गोपाल र गायिका आशा भोस्लेले गाएका थिए । यो गीतमा रनजीत गजमेरको संगीत र कुसुम गजमेरको शब्द रचना रहेको छ ।
बिहीबार सार्वजनिक रिमेक भर्सनमा गायक शंकर श्रेष्ठ तथा गायिका अन्नु चौधरीको स्वर रहेको छ ।
गीत सार्वजनिक कार्यक्रममा संगीतकार रनजीत गजमेर, अभिनेत्रीद्वय शर्मिला मल्ल, गौरी मल्ल, निर्माता मोहन सराफ लगायतको उपस्थिति थियो ।
सन्तोष राजबाहकले निर्देशन गरेको भिडियोमा भुवन केसी, शर्मिला मल्ल, सुरविर पण्डित, शिशिर भण्डारी, शंकर श्रेष्ठ, अश्विनी शाहीको अभिनय रहेको छ ।
भिडियोलाई ज्ञानेन्द्र शर्मा हुमागाईंले छायांकन र दिन्सन शाहले सम्पादन गरेका छन् । दुई भागमा निर्माण गरिएको भिडियोमा माया प्रेम र सम्बन्धको कथालाई प्रस्तुत गरिएको छ । गीतको भाव अनुसार भिडियोको कन्सेप्ट सुहाएको छ । भिडियोमा टिमको मेहनत देख्न सकिन्छ ।
भिडियो सार्वजनिक कार्यक्रममा बोल्दै संगीतकार रनजीत गजमेरले ३३ वर्षअघि मुम्बईमा गीत रेकर्डिङ्गको समयको स्मरण गर्दै भने – ‘त्यति बेला नारायण गोपाल र आशा भोस्लेले गीतलाई न्याय दिएका थिए, दर्शक–श्रोताले गीतलाई मन पराइदिनु भएको थियो । अझै पनि नयाँ गायक–गायिकाको स्वरलाई मन पराउनु हुनेछ भन्ने मलाई लाग्दछ ।’ गीतको भिडियो शिशिर भण्डारीको अफिसियल च्यानलमार्फत सार्वजनिक गरिएको छ ।
