काठमाडौँ, माघ २। पोखरामा आइतबार दुर्घटनामा परी ६८ जनाको ज्यान गएको यति एयरलाइन्सको एटीआर ७२ विमानको ब्ल्याक बक्स खोज तथा उद्धार टोलीले फेला पारेको छ । काठमाडौंको त्रिभुवन अन्तर्राष्ट्रिय विमानस्थलका प्रवक्ता प्रेमनाथ ठाकुरले ब्ल्याक बक्स फेला परेको जानकारी दिए ।
नेपाल नागरिक उड्डयन प्राधिकरणका प्रवक्ता जगन्नाथ निरौलाका अनुसार ब्ल्याक बक्स नेपाली सेनालाई बुझाइसकेको र आजै काठमाडौंमा छानबिन टोलीलाई बुझाइने छ । आइतबार दिउँसो बसेको मन्त्रिपरिषद् बैठकले दुर्घटनाको छानबिन गर्न संस्कृति, पर्यटन तथा नागरिक उड्डयन मन्त्रालयका पूर्वसचिव नगेन्द्र घिमिरेको संयोजकत्वमा पाँच सदस्यीय छानबिन समिति गठन गरेको थियो ।
यति एयरलाइन्सको उडान एनवाईटी ६९१ काठमाडौंबाट पोखराको नयाँ अन्तर्राष्ट्रिय विमानस्थलमा अवतरण गर्नुअघि नै आजसम्मकै सबैभन्दा खराब आन्तरिक हवाई दुर्घटनामा परेको छ ।
