काठमाडौं, कार्तिक २२ । इंग्लिस क्लब म्यानचेष्टर सिटी र जर्मन क्लब आरबी लाइपजिग युरोपियन च्याम्पियन्स लिगको नकआउट चरणमा प्रवेश गरेका छन् ।
समूह जी अन्तर्गत मंगलबार राती भएको खेलमा जित हात पार्दै सिटी र लाइपजिग दुई खेल अगावै प्रिक्वाटरफाइनलमा प्रवेश गरेका छन् ।
एलर्ङ हालान्डको दुई गोल मदतमा सिटीले स्वीस क्लब योङ ब्वाइजलाई ३-० ले हरायो ।
घरेलु मैदान एतिहाड स्टेडियममा भएको खेलमा सिटीका लागि हालान्डले २३औं र ५१औं मिनेटमा गोल गरे । फिल फोडेनले पहिलो हाफको इन्जुरी टाइममा एक गोल गरे ।
५३औं मिनेटमा सान्ड्रो लाउपर रातो कार्डको सामना गर्दै मैदान बाहिरिएपछि योङ ब्वाइज १० खेलाडीमा सिमित भएको थियो। शतप्रतिशत जित निकालेको सिटी चार खेलबाट १२ अंकसहित समूह जीको शीर्ष स्थानमा छ ।
यसै सहूको अर्को खेलमा लाइपजिगले रेडस्टार बेलग्रेडलाई २-१ ले हरायो । लाइपजिगका लागि जाभी सिमोन्स र लुइस ओपेन्डाले गोल गरे । चारमध्ये ३ खेल जित्दै ९ अंक जोडेको लाइपजिग दोस्रो स्थानमा रहेर सिटीसँग प्रिक्वाटरफाइनल पुगेको हो ।
चार खेलबाट समान १ अंक मात्र रहेको योङ ब्वाइज र रेडस्टार बेलग्रेड भने दुई खेल अगावै समूह चरणबाट बाहिरिएका छन् ।
Published Date: 08 November 2023
