भक्तपुर, कात्तिक १७ । भक्तपुर साकोसको २७ औँ स्थापना दिवसको अवसरमा आजबाट भक्तपुर साकोस रापिड नेसनल चेस च्याम्पियनसिप शुरु भएको छ । प्रतियोगितामा नेपाल बुद्धिचाल महासंघका कोषाध्यक्ष ताराबहादुर रानाभाट र भक्तपुर साकोसका अध्यक्ष निर्मल प्रजापतिले चेसको गोटी चाली संयुक्त रुपमा उद्घाटन गरेको हो ।
आज सम्पन्न चार चरणको खेलबाट नेपाल च्याम्पियन रुपेश जैसवाल, पुरुषोत्तम सिलवाल, पूर्व नेपाल च्याम्पियन बद्रीलाल नेपाली, ललितपुरका सरोज महर्जन र भक्तपुरका विक्रम चोकामी ४ अंकसहित अग्रता कायम गरेका छन् । त्यस्तै दोलखाका आशिष फुँयाल, भक्तपुरका राजेश कक्षपति, पूर्व नेपाल च्याम्पियन नवीन तण्डुकार, युवा खेलाडीहरू सुदिप तामाङ, धिरेन राई, सुरज सिंह ३.५ अंकसहित दोस्रो स्थानमा रहेका छन् ।
पाँचौ चरणदेखि नवौँ चरणसम्मका खेलहरू भोली बिहान १० बजेबाट शुरू हुने जनाएको छ ।
साथै कार्तिक १९ गते बिहान ८ बजे भक्तपुर साकोसको २७ औँ स्थापना दिवसको अवसरमा सहकारीका ज्येष्ठ सदस्यहरूलाई पोषण वितरण कार्यक्रम संस्थाको प्राङ्गणमा हुने समेत जनाएको छ ।
