काठमाडौँ, माघ १ । जेम्स क्यामरुनको चर्चित फिल्म टाइटानिक पुनः प्रदर्शनीमा आउने भएको छ । यो फिल्म पहिलोपटक रिलिज भएको २५ औं वार्षिकोत्सवको अवसर र भ्यालेन्टाइन्स सप्ताहको मौका पारेर थ्रीडी, फोर के, एचडीआरमा फेरि देखाइने भएको हो ।
टाइटानिक पुनः रिलिज गर्ने तयारीका साथ ट्रेलर एक हप्ताअघि नयाँ ट्रेलर र पोस्टर समेत सार्वजनिक गरिएको छ । सन् १९९७ को डिसेम्बरमा रिलिज भएको यस फिल्मले ११ वटा ओस्कार अवार्ड जितेको थियो । हलिउड र विश्व फिल्म इतिहासकै सबैभन्दा चर्चित फिल्म मध्ये एक मानिने यो प्रेम कथाले १५ हप्ता बक्स अफिसमा लगातार शीर्ष स्थानमा रहेर २.१८ अर्ब डलर बराबरको व्यापार गरेको थियो ।
फिल्मलाई थ्रीडी, फोर के, एचडीआर फरम्याटमा रिमास्टर गरेर पुनः निर्माण गर्न झण्डै एक करोड ८० लाख डलर अर्थात दुई अर्ब करोड रुपैयाँ भन्दा बढी खर्च भएको प्रारम्भिक अनुमान रहेको छ । यसअघि सन् २०१७ मै फिल्मको २० औं वार्षिकोत्सवमै थ्रीडी फरम्याटमा पुनः रिलिज गर्ने तयारी भएको थियो । भारतमा यो फिल्मलाई डिज्नी इन्डियाले रिलिज गर्ने भएको छ ।
