काठमाडौं, कात्तिक १४ । हालसम्म ७ वाणिज्य बैंकले लाभांश घोषणा गरिसकेका छन् । अझै १२ वाणिज्य बैंकले लाभांश घोषणा गर्न बाँकी छन् ।
लाभांश घोषणा गरि नसकेका बैंकहरुले कति र नगद वा बोनस के लाभांश वितरण गर्ने भन्ने बिषयमा सञ्चालकहरुबीच छलफललाई तिब्रता दिएका छन् । लाभांश कति दिने भन्दा पनि नगद र बोनस कति दिने भन्ने बिषयमा लाभांश वितरण गरि नसकेका केही बैंकका सञ्चालकहरुबीच तिब्र बिबाद देखिएको छ ।
केही बैंकका सञ्चालकहरुले नगद मात्रै र केहीले बोनस मात्रै दिनु पर्ने आवाज उठाउँदै आएका छन् । केही बैंकका सञ्चालकले भने नगद र बोनस दुबै दिनु पर्ने अडानमा छन् ।
खासगरी, मर्जर र एक्विजिसनमा गएर ठूलो चुक्ता पुँजी भएका बैंकले नगदलाई नै प्राथमिकता दिएका छन् । यद्यपी ग्लोबल आइएमई, नबिल जस्ता बैंकका सञ्चालकहरुले भने नगद र बोनस शेयर दिने निर्णय गर्दै छन् । कम चुक्ता पुँजी भएका बैंकले भने बोनसलाई नै जोड दिने भएका छन् ।
मर्जर र एक्विजिसनमा गएपछि अहिले कुल २० वाणिज्य बैंक मात्रै छन् । त्यसमध्ये ७ वाणिज्य बैंकले लाभांश घोषणा गरिसकेका छन् । अरु १२ बैंक लाभांश वितरण गर्न बाँकी छन् ।
