काठमाडौं, असोज १७ । नेपालमा हाल भारतको झारखण्ड आसपासको क्षेत्रमा रहेको न्यून चापीय क्षेत्रको समेत प्रभाव रहेको छ । यसैबीच, मौसमविदहरुले असोज १८ गते बिहिबारदेखि मनसुन पश्चिमी क्षेत्रबाट विस्तारै बाहिरिने जनाएका छन् ।
जल तथा मौसम विभागले आज पाँच प्रदेशमा हल्कादेखि मध्यम वर्षा हुने जनाएको छ । हाल देशभरको मौसम आंशिकदेखि सामान्य बदली रही गण्डकी र लुम्बिनी प्रदेशका केहि स्थानहरूमा साथै कोशी र बागमती प्रदेशका थोरै स्थानहरुमा हल्कादेखि मध्यम वर्षा भइरहेको छ ।
आज देशभर मौसम सामान्य बदली रही कोशी, मधेश बागमती, गण्डकी र लुम्बिनी प्रदेशका केही स्थानहरु र बाँकी प्रदेशका थोरै स्थानहरुमा मेघ गर्जन/चट्याङ्ग सहित हल्कादेखि मध्यम वर्षाको सम्भावना रहेको विभागले उल्लेख गरेको छ ।
साथै बागमती, गण्डकी र लुम्बिनी प्रदेशका एक–दुई स्थानमा भारी वर्षाको समेत सम्भावना रहेको विभागले जानकारी दिएको छ ।
बुधबार राति देशभर मौसम सामान्य बदली रहनेछ। कोशी, मधेश बागमती, गण्डकी र लुम्बिनी प्रदेशका केही स्थानहरु र बाँकी प्रदेशका थोरै स्थानहरुमा मेघ गर्जन/चट्याङ्गसहित हल्कादेखि मध्यम वर्षाको सम्भावना रहेको छ । साथै बागमती, गण्डकी र लुम्बिनी प्रदेशका एक–दुई स्थानमा भारी वर्षाको समेत सम्भावना रहेको विभागले जनाएको छ ।
पछिल्लो चौविस घण्टामा दाङको घोराहीमा सबैभन्दा धेरै वर्षा भएको छ । घोराहीमा ८७ दशमलव ६ मिलिमिटर वर्षा मापन गरिएको छ । यस्तै भैरहवामा ५६ मिलिमिटर, काठमाडौंमा २१ दशमलव ५ मिलिमिटर र सिमरामा १८ दशमलव ४ मिलिमिटर वर्षा मापन भएको छ ।
