काठमाडौं, भदौ २९ । थुप्रै सफल फिल्म निर्माण गरिसकेको अभिनेता तथा निर्माता दीपकराज गिरी,अभिनेत्री तथा निर्देशक दीपाश्री निरौला तथा निर्मल शर्माको समुहले निर्माण गरेको सिनेमा आज शुक्रबारदेखि सञ्चालनमा आएको छ ।
काठमाडौंस्थित नयाँ बानेश्वर चोकैमा आईएनआई सिनेमा हल सञ्चालनमा आएको हो । नयाँ वानेश्वरबाट शंखमुलतर्फ जाने मुख्य सडकमै रहेको यो हलको आज बिहानउद्योग वाणिज्य महासंघका अध्यक्ष चन्द्र ढकाल तथा वरिष्ठ कलाकार हरिवंश आचार्यले रिबन काटेर उद्घाटन गरेका छन् ।
दुई वटा पर्दा रहेको आइएनआई सिनेमा हलमा आजदेखि नेपाली फिल्म ‘एक भागवत र एक गीता’ (सामाजिक कथा) तथा ‘नाङ्गो गाउँ’ सँगै ‘जवान’ र ‘द नन् २’ प्रदर्शन गरिएको छ ।
यो सिनेमा हलको पहिलो पर्दामा १७७ तथा दोश्रोमा २ सय १० जना दर्शकले एकै पटक फिल्म हेर्न सक्छन् । यी दुई सिनेमा हल निर्माण गर्न करिब १० करोड रुपैयाँ खर्च गरिएको हल सञ्चालक मध्येका दीपकराज गिरीको भनाई छ ।
