काठमाडौं, साउन ३० । सुन तस्करीमा संलग्न थप तीन चिनियाँ नागरिक पक्राउ परेका छन् ।
स्रोतका अनुसार पक्राउ पर्नेमा झाओ हुई, झोङ छ्याङ र ताङ जिङको नाम रहेको छ । उनीहरु चीन जाने क्रममा नेपाल प्रहरीको केन्द्रीय अनुसन्धान ब्यूरो (सिआइबी) ले पक्राउ गरेको हो । योसँगै सुन तस्करी मुद्दामा पक्राउ पर्नेको कुल संख्या २३ पुगेको छ ।
राजस्व अनुसन्धान विभाग (डिआरआई)ले साउन ३ गते सिनामंगलबाट सय किलो सुनसहितको ‘ब्रेक जुत्ता’ बरामद गरेको थियो । मोटरसाइकलको ब्रेक जुत्तामा सुन लुकाएर राखिएको पाइएको थियो । त्यतिबेला ब्रेक जुत्ता सहितको तौल लिइएको थियो ।
सुन तस्करी प्रकरणलाई समाधान गर्न सिआइबी, डीआरआई, एनआरबीलगायत राज्यका विभिन्न निकाय र टकसाल महाशाखाका प्रतिनिधि मिलेर काम गरिरहेका छन् । १९ दिनको अनुसन्धानपछि डीआरआईले थप अनुसन्धानको जिम्मा सिआइबीलाई दिएको थियो ।
Published Date: 15 August 2023
