भक्तपुर, साउन १७ । भक्तपुर नगरपालिका– ६ महाकालीस्थानमा अवस्थित ख्य पुखु (अंचा पुखु)मा दर्शनार्थीको घुइँचो लागेको छ । अधिकमासमा एक महिना मेला लाग्ने यस ख्य पुखुमा मत्स्यनारायण दर्शनका लागि भक्तजनको मेला लाग्ने गर्दछ ।
यस महिना भरि ख्य पुखुमा स्नान गर्नाले शरीरमा भएका घाउ खटिरा निको हुनुका साथै मस्यनारायणको पूजा गर्नाले घरमा सुख, शान्ति र पारिवारिक समृद्धि बढ्ने धार्मिक मान्यता छ ।
ख्य पुखुमा नुहाइधुवाइ गरी चोखो लुगा लगाएर मत्स्यनारायण महादेवलाई गङ्गाजल, पञ्चामृतले स्नान गराइ केरा, हरियो काँचो केराउ, मालपुवा चढाइ घिउको दियो बाल्ने परम्परा रहेको छ ।
ख्य पुखु (अंचा पुखु)…..
भक्तपुर नपा वडा नं ६ महाकाली देकोचा परिसरमा रहेको एक पोखरीको नाम हो ख्य पुखु । ख्य पुखु भन्नाले ख्यले (ठूलो चौर) मा बनेको पोखरी भन्ने अर्थ लाग्दछ ।
यस पोखरीलाई अंचा पुखु पनि भन्ने गरिन्छ । यस पोखरीको माझमा भुजसी नारायण (बुढानिलकण्ठ) बिराजमान रहेकै कारण कसै कसैले यसलाई सानो बुढानिलकण्ठ पनि भन्ने गर्दछ ।
त्यस्तै पोखरीको बिचमा मत्स्य नारायण मन्दिर पनि रहेको छ जहाँ नेपाल सम्बत अनुसार चार बर्षको एक पटक एक महिने अनल महिना भरी मनमास रहेको कारण यहाँ ठुलै मेला लाग्ने गर्दछ भने अरु समय स-साना बालकहरु पौडी खेल्ने गर्दछ ।
यस पोखरीको परिसरमा दस अवतार, हनुमान लगायत अन्य देवताहरुको मुर्तीहरु पनि रहेको छ । चारै तिर पर्खाल र पाटीले घेरिएको यस स्थानमा बिहान सबेरै देखि भजन किर्तन गर्नेहरुको घुइँचो लाग्ने गर्दछ ।
