काठमाडौं, साउन ७ । सरकारले ११ सचिवको सरुवा र दुई सचिवको नियुक्ति गरेको छ । सरकारका एक मन्त्रीका अनुसार हालै सचिवमा बढुवा भएका घनश्याम उपाध्यायलाई वाग्मती प्रदेशको मुख्यमन्त्रीको कार्यालयमा र लक्ष्मी बस्नेतलाई गण्डकी प्रदेशको मुख्यमन्त्रीको कार्यालयमा राखिएको छ ।
उपाध्याय र बस्नेतले प्रदेशमा मुख्य सचिवको रुपमा काम गर्नेछन् । सरकारले सचिव मधुसूदन बुर्लाकोटीलाई उपराष्ट्रपति कार्यालयमा र अर्का सचिव मुकुन्द निरौलालाई उद्योग, वाणिज्य तथा आपूर्ति मन्त्रालयमा सरुवा गरेको छ ।
निर्वाचन आयोगका सचिव गोकर्णमणि दवाडीलाई भूमि व्यवस्था तथा सहकारी मन्त्रालयमा सरुवा गरिएको छ । निर्वाचन आयोगका सचिव सूर्य गौतमको सरुवा भएको छ । उपराष्ट्रपतिको कार्यालयमा कार्यरत सचिव तोयाम रायलाई केन्द्रीय तथ्याङ्क विभागमा सरुवा गरिएको छ । पर्यटन मन्त्रालयका सचिव सुरेश अधिकारीलाई शिक्षा मन्त्रालयमा सरुवा गरिएको छ । सचिव भरतमणि सुवेदीलाई पर्यटन, रामकृष्ण सुवेदीलाई राष्ट्रिय प्राकृतिक स्रोत तथा वित्त आयोग र रविलाल पन्थलाई युवा तथा खेलकुद मन्त्रालयमा सरुवा गरिएको छ ।
सचिव दामोदर रेग्मीलाई सार्वजनिक खरिद अनुगमन कार्यालय र गोपी खनाललाई प्रधानमन्त्री कार्यालयमा सरुवा गरिएको छ । साउन ३ गते बसेको मन्त्रिपरिषद्को बैठकले सचिवहरुको सरुवा र नियुक्ति गर्ने निर्णय गरेको मन्त्रीले जानकारी दिए ।
