काठमाडौं, साउन ५ । राजस्व अनुसन्धान विभागले एक सय केजी सुन तस्करीमा संलग्न रहेको आरोपमा हालसम्म १० जनालाई पक्राउ गरेको छ । विभागको टोलीले गए राति थप तीन कार्गो कम्पनी सञ्चालकलाई पक्राउ गरेको छ । योसँगै पक्राउ पर्नेको संख्या १० पुगेको छ ।
पक्राउ परेका ६ जनालाई यसअघि नै उच्च अदालत पाटनले १० दिन हिरासतमा राखेर अनुसन्धान गर्न अनुमति दिएको थियो । बिहीबार पक्राउ परेका चिनियाँ नागरिकसहित चारजनालाई आज म्याद थप गर्ने भनिएको छ ।
ट्रान्स ग्लोबल सर्भिसका सञ्चालक कृष्णकुमार श्रेष्ठ बिहीबार राति कोटेश्वरबाट पक्राउ परेका हुन् । यसअघि ट्रान्स ग्लोबल सर्भिसका सञ्चालक पुष्कर भट्ट र एलिस ट्रान्स ग्रुपका सञ्चालक राजन श्रेष्ठ पक्राउ परेका थिए ।
जुन कम्पनीको नामबाट सुन आयो, सो कम्पनीले सामान आयात–निर्यातमा सक्रिय रहेको पत्ता लगाएपछि उनीहरुलाई पक्राउ गरिएको डिआरआईका महानिर्देशक नवराज ढुंगानाले बताए । घटनामा संलग्न अन्यमाथि पनि अनुसन्धान भइरहेको छ ।
चिनियाँ नागरिक लिन जेक्वाङलाई बिहीबार दिउँसो पक्राउ गरिएको हो । उनलाई चीन जाने क्रममा त्रिभुवन अन्तर्राष्ट्रिय विमानस्थलबाट पक्राउ गरिएको हो । बुधबार पक्राउ पर्नेमा सुन तस्करीमा संलग्न ट्याक्सी चालक अशोक रानामगर, भन्सार एजेन्ट राजेन्द्रकुमार राई, रेडी ट्रेड प्रालिका सञ्चालक दिलीप भुजेल रहेका छन् ।
त्रिआया भन्सार कार्यालयले बुधबार राति हङकङबाट ल्याइएको झण्डै एक सय किलो सुन डिआरआईको टोलीले बरामद गरेको हो ।
Published Date: 21 July 2023
