काठमाडौं, साउन ५ । एसिया कप २०२३ को पहिलो खेलमा नेपालले पाकिस्तानको सामना गर्ने भएको छ ।
एसियन क्रिकेट काउन्सिलले घोषणा गरेको खेल तालिकाअनुसार आगामी भदौ दोस्रो सातादेखि प्रारम्भ हुने एसिया कपको उद्घाटन खेल नै नेपाल र पाकिस्तानबीच हुने भएको हो ।
उक्त खेल भदौ १३ गते पाकिस्तानको मुल्तानमा हुनेछ । यसपटकको एसिया कपको आयोजना पाकिस्तान र श्रीलंकामा हुँदैछ । लगत्तै नेपालले अर्को खेल भारतसँग श्रीलंकाको क्यान्डीमा भदौ १८ गते खेल्ने छ ।
एसिया कपको नेपाल समूह ‘ए’ मा छ । नेपालसँगै समूहमा भारत र पाकिस्तान छन् । समूह ‘बी’ मा बंगलादेश, श्रीलंका र अफगानिस्तान छन् । हरेक समूहको शीर्ष दुई टोली सुपर फोरमा पुग्ने छन् । सुपर फोरका भदौ २० गतेदेखि २९ गतेसम्म । सुपर फोरको एक खेलमात्रै पाकिस्तानमा हुनेछ । अन्य सबै श्रीलंकामा हुनेछन् ।
सुपर फोरमा शीर्ष स्थानमा पुग्ने दुई टोली भदौ ३१ गते फाइनलमा भिड्नेछन् । सुपर फोरको एउटा खेल लाहौरमा हुनेछ भने अन्य सबै सुपर फोर र फाइनल श्रीलंकामा हुनेछ । भारतले पाकिस्तान जान अस्वीकार गरेपछि खेलहरू श्रीलंकामा हुन लागेका हुन् ।
