काठमाडौं, साउन २४ । त्रिभुवन अन्तर्राष्ट्रिय विमानस्थलबाट सुन तस्करी गरेको अभियोगमा थप एक चिनियाँ नागरिक पक्राउ परेका छन् ।
प्रहरीले चिनियाँ नागरिक लिङ्चुआनलाई बिहीबार विमानस्थलबाट पक्राउ गरेको हो ।
त्रिभुवन अन्तर्राष्ट्रिय विमानस्थलबाट सुन लुकाई तस्करी गरेको अभियोगमा अहिलेसम्म सात जना पक्राउ परेका छन् ।
प्रहरीका अनुसार देशमा सबैभन्दा ठूलो तस्करी सुन बरामद गर्ने क्रममा एक भारतीय र एक चिनियाँ नागरिकसहित सात जना पक्राउ परेका छन् ।
पक्राउ पर्नेमा दोलखाको मेलुङ गाउँपालिका–३ घर भई हाल काठमाडौं साँखु बस्ने २१ वर्षीय दिलीप भुजेल र हाल काठमाडौंको स्वयम्भू बस्ने सोही ठेगानाका ५३ वर्षीय रामकुमार भुजेल रहेका छन् ।
त्यस्तै, भोजपुर अरुण गाउँपालिका–४ का ४९ वर्षीय हर्कराज राई र हाल काठमाडौं बुढानिलकण्ठ बस्ने ४९ वर्षीय थाप्तेन छिरिङ, पुरानो दिल्ली र हाल पानीपोखरी काठमाडौं बस्ने भारतीय नागरिक राजेन्द्र राई र भन्सार एजेन्ट अशोक लालाई पक्राउ गरिएको छ ।
बुधबार विमानस्थलबाट निस्किएको बा २ ज २३२४ नम्बरको ट्याक्सीबाट राजस्व अनुसन्धान विभागले करिब १०० किलो अवैध सुन बरामद गरेको हो ।
Published Date: 20 July 2023
