काठमाडौं, असार २२ । प्रधानमन्त्री पुष्पकमल दाहालले निजी क्षेत्रका विद्युत् उत्पादक कम्पनीले उठाएका माग सम्बोधन गर्न सरकारले सक्दो पहल गर्ने बताएका छन् ।
प्रधानमन्त्री निवास बालुवाटारमा आज स्वतन्त्र उर्जा उत्पादक संघ नेपालका पदाधिकारीहरुसँगको भेटमा प्रधानमन्त्री दाहालले पहिरो र बाढीबाट क्षति भएका आयोजनाको मुआब्जा दिन सरकारले पहल गर्ने बताए ।
उनले हालैको भारत भ्रमणका क्रममा भएका सम्झौता कार्यान्वयनका लागि आवश्यक तयारी र पहल भइरहेको जानकारी दिए ।
प्रधानमन्त्रीले स्वतन्त्र उर्जा उत्पादकहरुले उठाएका केही नीतिगत र समसामयिक विषयलाई सम्बोधन गर्ने आश्वासन पनि दिए ।
सो अवसरमा इपानले क्षतिग्रस्त जलविद्युत् आयोजनाको पुनर्निर्माणका लागि नेपाल राष्ट्र बैंकसँग पुनर्कर्जा, विद्युत उत्पादनको म्याद दुई वर्ष थप गर्न र पुनर्निर्माणका लागि आवश्यक मेसिन तथा पार्टपुर्जा आयात गर्दा भन्सार र भ्याटमा छुट उपलब्ध गराउन माग गरेको थियो ।
संघका अध्यक्ष गणेश कार्कीले ‘सर्भेयर’को प्रारम्भिक विवरणका आधारमा बीमाबाट ५० प्रतिशत अग्रिम उपलब्ध गराउने र २० प्रतिशत सम्म आयोजनाको पुनर्निर्माणका लागि लिएको ऋणको पुनर्तालिकाको व्यवस्था गर्न पनि प्रधानमन्त्रीसँग माग गरेका छन् ।
ऊर्जा विकासका लागि अनुकूल वातावरण सिर्जना गर्न, नेपाल विद्युत प्राधिकरणमा निवेदन दिएका आयोजनासँग विद्युत् खरिद सम्झौता गर्न र विद्युत ऐन तुरुन्त पारित गर्नुपर्ने पनि ऊर्जा उत्पादकहरूले माग गरेका छन् ।
