काठमाडौं, असार १९ । नेपाल आयल निगमले हवाई इन्धनको मूल्य घटाएपछि आन्तरिक उडानको भाडा घटेको छ । नेपाल नागरिक उड्डयन प्राधिकरणका अनुसार रुटका आधारमा आन्तरिक उडानका लागि न्यूनतम ६० रुपैयाँबाट बढीमा ७५० रुपैयाँसम्म भाडादर घटाइएको छ । संशोधित हवाई भाडादर मंगलबारदेखि लागू हुने भएको छ ।
निगमले सोमबार हवाई इन्धनको मूल्य प्रतिलिटर १४ रुपैयाँ घटाएको हो । प्रतिलिटर १ सय ५० रुपैयाँ रहेको हवाई इन्धनको मूल्य अहिले ९ दशमलव ३ प्रतिशतले घटाएर १ सय ३६ रुपैयाँ कायम गरिएको छ ।
क्यानका अनुसार विराटनगरदेखि नेपालगञ्जसम्मको लामो रुट (१००.९ मिनेट) को नयाँ हवाई भाडा प्रति टिकट ७५० रुपैयाँले घटाएर ७ हजार ३०५ रुपैयाँ तोकिएको छ ।
काठमाडौंदेखि धनगढीसम्मको सबैभन्दा टाढाको रुट (८९.०९ मिनेट)को हवाई भाडा ६ सय १५ रुपैयाँले घटेर ६ हजार १० पुगेको छ ।
काठमाडौं–पहाड उडानका लागि ४८५ रुपैयाँ, काठमाडौं–भद्रपुरमा ४२० रुपैयाँ, काठमाडौं–विराटनगरको ३ सय ३५ रुपैयाँ, काठमाडौं–जनकपुरमा १८० रुपैयाँ, काठमाडौं–भरतपुरको भाडामा १ सय ५० रुपैयाँ, काठमाडौं–भद्रपुरको भाडामा ५ रुपैयाँले घटेको छ । काठमाडौं–भैरवा रु २८५, काठमाडौँ–नेपालगन्ज रु ४५५, काठमाडौँ–तुम्लिङटार रु दुई हजार ६०९ र काठमाडौँ–सिमरा रु १२५ ले भाडा तोकेको छ ।
Published Date: 04 July 2023
