काठमाडौं, असार १९ । सरकारले निजामती कर्मचारीका छोराछोरीलाई उच्च शिक्षाका लागि छात्रवृत्ति वितरण गर्न करिब १८ करोड रुपैयाँ खर्च गर्ने भएको छ ।
संघीय मामिला तथा सामान्य प्रशासन मन्त्रालयका अनुसार यस वर्ष निजामती कर्मचारीका ६ सय ८७ बालबालिकाले शैक्षिक प्रोत्साहन भत्ता पाउनेछन् । मन्त्रालयले सोमबार स्नातक तहको प्रथम वर्ष वा प्रथम वा दोस्रो सेमेस्टरमा अध्ययनरत विद्यार्थीलाई छात्रवृत्ति प्रदान गर्ने जनाएको छ ।
तोकिएको प्रक्रिया र योग्यता पूरा गरेका विद्यार्थीका लागि सम्बन्धित निजामती कर्मचारीको बैंक खातामा १७ करोड ८१ लाख रुपैयाँ जम्मा गर्ने निर्णय भएको मन्त्रालयले जनाएको छ ।
मन्त्रालयका अनुसार चिकित्सा संकायबाट १ सय ४४, स्वास्थ्य विज्ञानमा २९, आयुर्वेद १, इन्जिनियरिङमा २ सय २९, वनविज्ञानमा ५, कृषि विज्ञानमा ३६, विज्ञानमा १२, कानूनमा ४५ र व्यवस्थापनमा १ सय १९ विद्यार्थी उत्तीर्ण भएका छन् । त्यसैगरी शिक्षामा ४ जना, मानविकीतर्फ ११ जना र सूचना प्रविधि संकायका ५२ जना विद्यार्थी छात्रवृत्तिका लागि छनोट भएका छन् ।
मन्त्रालयले निजामती कर्मचारीका छोराछोरीलाई छात्रवृत्ति वितरण गर्ने कार्यविधि तयार गरेको छ । कार्यविधिमा सरकारले आवश्यक ठानेमा छात्रवृत्ति पाएका विद्यार्थीलाई एक वर्षभित्र जुनसुकै ठाउँमा रोजगारी दिन सक्ने व्यवस्था छ ।
संघीय मामिला मन्त्रालयका अनुसार हालसम्म निजामती कर्मचारीका दुई हजार ८७७ बालबालिकाले विभिन्न विषयमा उच्च शिक्षाका लागि छात्रवृत्ति पाएका छन् । निजामती कर्मचारीका छोराछोरीलाई उच्च शिक्षामा उत्प्रेरित गर्ने उद्देश्यले आर्थिक वर्ष २०६६/६७ देखि छात्रवृत्ति प्रदान गरिएको थियो । यो कार्यक्रमका लागि सरकारले हालसम्म रु ६० करोड ४० लाख खर्च गरिसकेको छ । यो कार्यक्रम आर्थिक वर्ष २०७३/७४ सम्म सञ्चालन भएको थियो । यो कार्यक्रम गत वर्षदेखि पुनः सञ्चालनमा आएको हो ।
