काठमाडौं, असार १९ । उद्योग, वाणिज्य तथा आपूर्ति मन्त्रालयले यो वर्ष वर्षायाममा कतै पनि खाद्यान्न अभाव नहुने बताएको छ । देशभरका गोदामहरूमा खाद्यान्नको राम्रो भण्डार रहेको र थप खाद्यान्न खरिद गरी आपूर्ति गर्ने प्रक्रिया अघि बढेको मन्त्रालयले जनाएको छ ।
खाद्य व्यवस्था तथा व्यापार कम्पनीका अनुसार हाल काठमाडौं उपत्यका र तराई जिल्लामा ३६ हजार ३५६ क्विन्टल खाद्यान्न मौज्दात रहेको छ ।
त्यस्तै दुर्गम जिल्लामा २५ हजार ५०५ क्विन्टल खाद्यान्न मौज्दात रहेको कम्पनीले जनाएको छ । अहिले २६ हजार ३७५ क्विन्टल धान मौज्दात छ ।
भारतबाट आयात कोटा अन्तर्गत साल्ट ट्रेडिङमार्फत कुल ३४ हजार ३२० क्विन्टल गहुँ तत्काल प्राप्त हुनेछ । कम्पनीसँग २ लाख ६६ हजार ३ सय क्विन्टल खाद्यान्न मौज्दात छ । प्रतियोगितामार्फत भएको सम्झौताअनुसार गोदाममा ८९ हजार १ सय क्विन्टल खाद्यान्न आइपुगेको छ भने भारतबाट आयात हुने खाद्यान्न लोड भइसकेको छ ।
चालू आर्थिक वर्षको असार २७ गतेसम्म दुर्गम जिल्लामा १७ हजार ८३० मेट्रिक टन खाद्यान्न आपूर्ति भएको छ । हुम्लामा खाद्यान्नको कोटा बढाएर वितरण भइरहेको छ ।
पूर्वका जिल्लामा पर्याप्त मात्रामा खाद्यान्न मौज्दात रहेको कम्पनीले जनाएको छ । स्थानीय तहमा खाद्यान्न मौज्दात गर्ने ठाउँ नभएकाले वितरण केन्द्रमा आपूर्ति गरेर खाद्यान्न वितरण भइरहेको छ ।
चालु आर्थिक वर्षमा हालसम्म स्थानीय तहबाट ४७ हजार ३३४ क्विन्टल चामल वितरण भइसकेको छ ।
