काठमाडौं, जेठ २४ । नेपाल रुस साहित्य समाज र रुसी भवन काठमाडौँको आयोजनामा विश्वविख्यात रुसी कवि, नाटककार र उपन्यासकार अलेक्सान्दर पुश्किनको २२४औं जयन्ती आयोजना गरियो । सोहि कार्यक्रममा रूसी भाषा दिवस पनि मनाइएको हो।
कार्यक्रमका प्रमुख अतिथि नेपाल संगित तथा नाट्य प्रतिष्ठानका कुलपती निशा शर्मा र रुसी भवनका निर्देशक अन्तोन मास्लोभद्वारा रुसी सांस्कृतिक केन्द्रको परिसरमा अवस्थित पुश्किनको सालिकमा माल्यार्पण गरेर कार्यक्रम सुरु भएको थियो । साथै पुश्किनको जन्मकार्य थलोको डकुमेन्ट्री पनि प्रदर्शन गरिएको थियो।
नेपाल रुस साहित्य समाजका अध्यक्ष जंगबचौहानको सभापतित्वमा भएको कार्यक्रमको संचालन मित्रकुञ्जका सचिव ई. रामविन्दु श्रेष्ठले गरेका थिए । कार्यक्रममा अतिथीहरुको स्वागतगर्दै रुसी भवनका निर्देशक अन्तोन मास्लोभले रुसी भाषा साहित्यको विकासमा पुश्किनको भूमिकाबारे प्रकाश पारे ।
सास्कृतिक केन्द्रका भाषा शिक्षक सुशील सिग्देलले रुसी भाषाको विशेषताहरु र विश्वव्यापी महत्व प्रस्तुत गरे । कुलपती निशा शर्माले आफ्नो मस्को थियटरहरुको स्मरण गर्दै हामीले पनि भानुभक्तलाई त्यस्तै सम्मान प्रकट गर्नुपर्ने कुरा औंल्याइन् ।
यो जयन्तीको प्रमुख आकर्षण रहेको पुश्किन काव्यिक साँझमा रुसी तथा नेपाली स्रस्टाहरुले पुश्किनका कालजयीकविताहरु वाचन गरे । जसमा लिजा कारञ्जित र नेरुसासका महासचिव ई. चन्द्र कान्त आचार्यले स्मारक, नाताल्या र ई. विष्णु व. सिंहले फूल, लिजा कारञ्जित र सुष्मा खत्री रञ्जीतले प्रतिध्वनी , डाइरेक्टर अन्तोन मस्लोभ र डा. आमोद मणी दिक्षितले माया गरे तिमीलाई विक्रम के.सी. र कवियत्री मोमिलाले शोक गीत र ताच्याना वैद्य र नेपालीकला साहित्य डट कमकी अध्यक्ष मोमिलाले धाई आमा क्रमशः रुसी र नेपालीमा कविता पढे ।
शिल्पी थियटरबाट पुश्किनको कविता कैदीमा आधारित एकांकी नाटक प्रदर्शनले उनको रचनालाई जीवन्त बनाएको थियो ।
कार्यक्रममा जनमैत्री विश्वविद्यालयबाट भाषा शास्त्रमा विद्यावारीधि गरेका प्रा.डा. बलराम अर्यालद्धारा अनुदित दुई पुस्तकहरु निकोलाइ गोगल, लेभ तोल्सतोय र अन्तोन चेखवका छानिएका कथाहरुको संग्रह थप बसिबिंयार्लो र लेभ तोल्सतोयका लघुत्तम बाल कथाहरुको विमोचन पनि भयो ।
कार्यक्रमको अन्त्यमा सबै सहभागीहरुलाई धन्यवाद दिदैं नेरुसासका उपाध्यक्ष ई. विष्णु व. सिंहले संस्थाको प्रगति तथा भावी योजनाहरु प्रस्तुत गरे । साथै कार्यक्रम संचालक रामविन्दु श्रेष्ठले रूसी भाषादिवसको अवसरमा हामी संसार भरका विद्यार्थीहरुलाई रूसी भाषा सिकाएर उच्च शिक्षा हासिल गर्न योग्य बनाउने गुरुहरु प्रति आभार व्यक्त गरे ।
कार्यक्रम समापन गर्दे नेरुसासका अध्यक्ष प्रो डा. जंगब चौहानले पुश्किनका जीवनका मार्मिक र प्रेरक सन्दर्भहरु, उनको धाईआमा प्रतिको स्नेह र प्रेरणा अनिपुश्किनले बिताएका जीवनकालका भूगोलहरुमा आफुले भ्रमण गर्दाको अनुभवहरुे प्रस्तुत गरे ।
कार्यक्रममा विभिन्न क्षेत्रमा कार्यरत लेखक, कलाकार, विद्वान र साहित्यकारहरुको सहभागिता रहेको थियो ।
