भक्तपुर, जेठ २१ । राष्ट्रिय स्वतन्त्र पार्टी मध्यपुर थिमि नगरमा सम्पन्न भएको भेलाले न्हुछेरत्न मानन्धरको नेतृत्वमा १३ सदस्यीय नयाँ नगर समिति बनाएको छ ।
शनिबार सम्पन्न कार्यक्रमबाट उपसभापतिमा स्मृति भट्टराई (श्रेष्ठ), सचिव मुरारी नेपाल तथा कोषाध्यक्षमा समीर पौडेल निर्वाचित भएका छन् । त्यस्तै सदस्यहरुमा गुन्जना ढुंगाना, आराधाना बर्मा, अमित दाहाल, सुवास कोइराला, शैलेस जोशी, नरेश राज बज्राचार्य, श्याम जोशी, अश्विन खनाल र उषा प्रजापति छन् ।
कार्यक्रममा रास्वपाका सांसद विराजभक्त श्रेष्ठले अहिलेका राजनीतिज्ञहरुको विकल्प खोज्नुपर्ने अवस्था आएको बताए । सांसद श्रेष्ठले स्थानिय सरकार अधिकार सम्पन्न भएको अवस्थामा पालिका र वडा स्तरमा भइरहेका विकास निर्माण तथा योजनालाई निगरानी गर्नुपर्नेमा जोड दिए ।
सरकारले विनियोजन गरेको वजेट सही ढंगले प्रयोग भएको छ वा छैन भन्ने विषयमा समेत निगरानी राख्न उनले आग्रह गरे ।उनले स्थानिय ठाउँको विकास निर्माण सम्बन्धिको योजनालाई स्थानिय स्तरबाटै तय गरेर अगाडि बढ्नुपर्नेमा जोड दिंदै भाषा, संस्कृति, समाजिक न्यायको विषयमा काम गर्नुपर्ने बताए ।
