काठमाडौँ, जेठ २१ । नेपालले मलेसियासँगको पाँचौं तथा निर्णायक खेलमा टस जितेको छ । नेपालकी कप्तान रुविना क्षेत्री बेलबासेले टस जितेर पहिला फिल्डिङ गर्ने निर्णय लिएकी छिन् ।
नेपालले चौथो खेलबाट टोलीमा एक परिवर्तन गरेको छ । स्पिनर कृतिका मरासिनीलाई आजको खेलमा मौका दिएको छ । कृतिकालाई मौका दिँदा विकेटकिपर काजोल श्रेष्ठलाई नेपालले बेन्चमा राखेको छ । नेपालले अन्य परिवर्तन भने गरेको छैन । पाँच खेलको सिरिज २-२ को बराबरी अवस्थामा छ ।
नेपाल पहिलो खेलमा ५ र चौथो खेलमा ४ विकेटले पराजित भएको थियो । नेपाल दोस्रो र तेस्रो खेलमा ७ विकेट तथा २७ रनले विजयी भएको थियो । आज विजयी हुने टोलीले सिरिज पनि जित्नेछ ।
नेपालको प्लेइङ ११ :
रुविना क्षेत्री बेलबासे (कप्तान), सीता रानामगर, इन्दु बर्मा, कविता कुवँर, कविता जोशी, अप्सरी बेगम, विन्दु रावल, कृतिका मरासिनी, सम्झना खड्का, ईश्वरी विषट र ज्याति पाण्डे ।
Published Date: 04 June 2023
