काठमाडौं, जेठ ४ । लगानीकर्ताले नयाँ स्टक एक्सचेन्जको लाइसेन्स दिन ढिला नगर्न आग्रह गरेका छन् ।
लगानीकर्ताले बुधबार प्रधानमन्त्री पुष्पकमल दाहालसँग भेट गरी नयाँ स्टक एक्सचेन्ज र नयाँ ब्रोकर लाइसेन्सको काम चाँडो पूरा गर्न आग्रह गरेका छन् ।
त्यसैगरी शेयर कर्जाको सीमा १२ करोड फिर्ता गर्न, कर्जाको जोखिमको बोझ शतप्रतिशतमा घटाउन र लगानीकर्तालाई दुई भागमा विभाजन गरी पुँजीगत लाभकर असुल गर्न समेत आग्रह गरेका छन् ।
अल्पकालीन लगानीकर्तालाई ५ प्रतिशत र दीर्घकालीन लगानीकर्तालाई ३ प्रतिशत पुँजीगत लाभकर लगाउन लगानीकर्ताले आग्रह गरेका छन् । ब्याजदरका कारण लगानीकर्ता निरुत्साहित भएकाले यसलाई पुनरावलोकन गरी एक अंकमा झार्नुपर्ने उनीहरुको माग छ ।
यसअघि नेपाल धितोपत्र बोर्ड (सेबोन)ले धितोपत्र बजार सुधार गर्न नयाँ ब्रोकर, स्टक एक्सचेन्ज, कमोडिटी एक्सचेन्ज आदिका लागि इजाजतपत्र प्रक्रिया अगाडि बढाएको थियो ।
निवेदन बन्द गरी मूल्याङ्कन प्रक्रिया सुरु भएसँगै प्रधानमन्त्री दाहालको आदेशमा स्टक एक्सचेन्जको लाइसेन्स प्रक्रिया रोकिएको छ भने ब्रोकरको लाइसेन्स प्रक्रियामा पनि छेडछाड गर्ने प्रयास भइरहेको लगानीकर्ताको आरोप छ ।
स्टक एक्सचेन्ज लाइसेन्स प्रक्रियामा हिमालयन स्टक एक्सचेन्ज, नेशनल स्टक एक्सचेन्ज र अन्नपूर्ण स्टक एक्सचेन्ज गरी तीन कम्पनीले नेपालको अधिकांश व्यवसायी समूहको सहभागितामा आवेदन दिएका थिए ।
आफूले पेश गरेका व्यापार योजनाको मूल्याङ्कन सुरु भई अंक दिएपछि प्रधानमन्त्रीले केही स्वार्थी समूहको दबाबमा लाइसेन्स प्रक्रिया रोक्न निर्देशन दिएको लगानीकर्ताको दाबी छ।
Published Date: 18 May 2023
