काठमाडौं, वैशाख २४ । काठमाडौं महानगरपालिकाले सडक छेउमा पार्किङ गर्न नदिने निर्णय गरेपछि ट्याक्सी चालकले आन्दोलन गरेका छन् । उनीहरुले सडकमा पार्किङ बोर्ड र ट्याक्सी पार्क गरेर विरोध प्रदर्शन गरेका थिए ।
प्रहरीले ट्याक्सी चालकले राखेको स्ट्याण्ड हटाउन खोज्दा प्रहरी र आन्दोलनकारी ट्याक्सी चालकबीच केहीबेर झडप भएको ट्राफिक प्रहरीले जनाएको छ ।
प्रहरीले बल प्रयोग गर्न खोजेपछि ट्याक्सी चालकले सडकको बीचमा मैतीदेवी चोकमा एक घण्टासम्म ट्याक्सी राखेका थिए । त्यसैगरी मैतीदेवीको एउटै स्थानमा २५ वटा ट्याक्सी पार्क गरेर सवारी आवागमन ठप्प पारेको छ । एक घण्टा सडक अवरुद्ध गरेपछि ट्राफिक प्रहरीसहित पाँच ट्याक्सी चालक वार्ताका लागि महानगर पुगेका थिए ।
यसैबीच महानगरपालिकाले ट्याक्सी चालकले अनाधिकृत रुपमा ट्याक्सी पार्किङ गरेर समस्या सिर्जना गरेको बताएको छ । ‘पार्किङ गर्न नपाइने ठाउँमा बोर्ड हटाएका थियौँ तर अहिले सुन्धारा, मैतीदेवीलगायत ठाउँमा पार्किङ बोर्ड राखेर ट्याक्सी पार्किङ गरिरहेका छन्,’ कामपाका प्रहरी प्रमुख राजुनाथ पाण्डेले भने ।
महानगरले उचित छलफल नगरी अनाधिकृत बोर्ड राख्ने ट्याक्सी चालकलाई सम्बन्धित वडा कार्यालय र ट्राफिक प्रहरीसँग छलफल गरी कारबाही गर्ने उनले बताए ।
