काठमाडौं, वैशाख २४ । नेपाल नागरिक उड्डयन प्राधिकरणले सिम्रिक एयरको हेलिकप्टर उडानमा प्रतिबन्ध लगाएको छ ।
शुक्रबार संखुवासभामा सिम्रिक एयरको हेलिकप्टर दुर्घटनाको विषयलाई लिएर प्राधिकरणले कम्पनीका अन्य हेलिकप्टर उडानमा रोक लगाएको छ ।
प्राधिकरणले अर्को सूचना नभएसम्मका लागि कम्पनीका सबै हेलिकप्टर उडानमा रोक लगाएको जनाएको छ । अन्य हेलिकप्टरको निरीक्षण र कम्पनीको लेखा परीक्षण नभएसम्म उडान नहुने जानकारी दिएको छ ।
शुक्रबार भोटखोला गाउँपालिका–४ हम्मारेडाँडामा अवतरण गर्ने क्रममा दुर्घटना भएको हो । हेलिकप्टरले माथिल्लो अरुण जलविद्युत आयोजनाको निर्माण सामग्री बोकेको थियो ।
दुर्घटनामा परी क्याप्टेन सुरेन्द्र पौडेल, सहायक कप्तान मनोज थापा, छिरिङ भोटे र नेपाल विद्युत प्राधिकरणका कर्मचारी विक्रम गुरुङ घाइते भएका छन् भने भविन गुरुङको मृत्यु भएको छ ।
