काठमाडौं, वैशाख २३ । प्रधानमन्त्री पुष्पकमल दाहालले नक्कली शरणार्थी घोटालामा संलग्न कसैलाई पनि नछाड्ने दृढता व्यक्त गरेका छन् । उनले कुनै पनि तर्फबाट दबाब नदिने र दोषीलाई कानुनी कठघरामा ल्याइने बताए ।
आज सिंहदरबारमा नेकपा एमालेका अध्यक्ष केपी शर्मा ओलीसँगको भेटपछि सञ्चारकर्मीसँगको संक्षिप्त कुराकानीमा प्रधानमन्त्री दाहालले सो कुरा बताएका हुन् ।
प्रधानमन्त्री दाहालले नक्कली शरणार्थी घोटालामा पार्टीका वरिष्ठ नेताविरुद्ध भइरहेको अनुसन्धानमा एमाले अध्यक्ष ओलीले चासो देखाएको बताए । ‘अनुसन्धान प्रक्रिया कानुनबमोजिम अघि बढ्छ, रोकिने छैन, दृढ संकल्पका साथ अगाडि बढ्छौं,’ उनले भने ।
प्रधानमन्त्रीले कोही निर्दोषलाई कारबाही नहोस् र दोषीलाई छुट दिनु हुँदैन भन्ने विश्वासका साथ सरकारले काम गरिरहेको बताए ।
