काठमाडौं, वैशाख २३ । भौतिक पूर्वाधार तथा यातायातमन्त्री प्रकाश ज्वालाले हुलाकी राजमार्गअन्तर्गत बेटौना–विराटनगर सडकखण्डको काम राम्रोसँग नगर्ने निर्माण कम्पनीलाई कारबाही गर्न निर्देशन दिएका छन् ।
मन्त्री ज्वालाले सडक विभाग र इटहरी कार्यालयका आयोजना प्रमुखलाई टेलिफोन गरी निर्माण कम्पनीलाई तत्काल कारबाही गर्न निर्देशन दिएका हुन् । उनले मातहतका निकायलाई तत्काल समस्या समाधान गर्न निर्देशन दिए ।
बेटौनादेखि विराटनगरसम्मको १८ किलोमिटर सडक निर्माणको काम एक महिनादेखि ठप्प छ । निर्माण रोकिएपछि इटहरी कार्यालयले निर्माण व्यवसायीलाई लिखित पत्र पठाएको थियो । तत्काल निर्माण सम्पन्न गरी काम अघि नबढाउने निर्माण व्यवसायीलाई सार्वजनिक खरिद ऐन, नियमावली र ठेक्का सम्झौता बमोजिम कारबाही गरिने छ ।
हुलाकी राजमार्गको उक्त खण्डको निर्माण कार्यमा विगतदेखि जनप्रतिनिधिले चासो देखाउँदै आएका छन् । अब निर्माण कम्पनीले काम रोकेपछि शुक्रबार संघीय संसदका सदस्य, प्रदेशसभा सदस्य र पाँच स्थानीय तहका जनप्रतिनिधिले पत्रकार सम्मेलन गरेका छन् ।
हुलाकी राजमार्ग निर्देशनालय अन्तर्गत इटहरी योजनाको दायरामा झापा, मोरङ, सुनसरी र सप्तरी गरी चार जिल्ला छन् । जम्माको ४४ किलोमिटर खण्डमा भएका पाँच ठेक्कामध्ये हालसम्म २० किलोमिटर सडक कालोपत्र भएको छ ।
Published Date: 06 May 2023
