कञ्चनपुर, वैशाख १७ । परराष्ट्रमन्त्री नारायणप्रकाश साउदले मुलुकको अर्थतन्त्र सबल रहेको बताएको छ ।
शुक्लाफाँटा नगरपालिका–५ मा आज पार्टी कार्यकर्तालाई सम्बोधन गर्दै उनले विदेशी मुद्रा सञ्चिति १०–१२ महिनासम्म टिक्न सक्ने भएकाले आत्तिनुपर्ने अवस्था नरहेको बताए । देश ‘श्रीलंकाको बाटो’ तर्फ उन्मुख भएको प्रचार गरेपनि यथार्थ भने अर्कै रहेको उनले बताए ।
संसदमा यस क्षेत्रको प्रतिनिधित्व गर्दै आएका नेपाली कांग्रेसका नेता साउदले भूमि आयोगले निर्धारण गरेको जग्गा राजस्व उच्च रहेको भन्दै परिमार्जन गरिने बताए । उनले वन्यजन्तु आरक्षबाट विस्थापित जनताको समस्या समाधान गर्ने प्रतिबद्धता पनि व्यक्त गरे ।
त्यस्तै, चालु आर्थिक वर्षदेखि चौधरी नदी नियन्त्रणको काम अघि बढाइनेछ । कञ्चनपुर जिल्लाबाट बग्ने अन्य नदीमा पनि नदी तालिम कार्यलाई अगाडि बढाइनेछ ।
उनले पार्टीका एजेण्डा र प्राथमिकताका साथ जनतासमक्ष पुग्न जिल्लाका कार्यकर्ता र नेताहरुलाई आग्रह गरे ।
