काठमाडौं, वैशाख १७ । प्रतिकूल मौसमका कारण त्रिभुवन अन्तर्राष्ट्रिय विमानस्थलबाट हुने उडान प्रभावित भएको छ ।
भिजिबिलिटी कम भएकाले विमानस्थलबाट हुने आन्तरिक तथा अन्तर्राष्ट्रिय उडान सामान्यतया प्रभावित भएको विमानस्थल कार्यालयले जनाएको छ । विमानस्थलका महाप्रबन्धक प्रतापबाबु तिवारीका अनुसार कमजोर भिजिबिलिटी र खराब मौसमका कारण विभिन्न अन्तर्राष्ट्रिय तथा आन्तरिक गन्तव्यमा उडान समयमा हुन नसकेका छन् भने केही अन्तर्राष्ट्रिय उडान आकाशमै रोकिएका छन् ।
जल तथा मौसम विज्ञान विभागको मौसम पूर्वानुमान महाशाखाका अनुसार हाल देशमा पश्चिमी वायु र स्थानीय वायुको प्रभावले हावाहुरीसहित वर्षा भइरहेको छ । वर्षाका कारण शनिबार दिउँसोदेखि बेलुकासम्म उडान प्रभावित भएको छ ।
हाल कोशी र वाग्मती प्रदेशका पहाडी भू–भागका केही स्थानमा आंशिकदेखि सामान्य वर्षा भइरहेको तथा पहाडी भू–भागका एक–दुई स्थानमा वर्षा भइरहेको महाशाखाले जनाएको छ । आज बिहानैदेखि काठमाडौंको आकाशमा आंशिक बदली भएको छ । अहिले उपत्यकाका केही स्थानमा मेघ गर्जनसहित वर्षा भइरहेको छ ।
Published Date: 30 April 2023
