भक्तपुर, वैशाख २ । नयाँ वर्ष २०८० मनाउन विगत तीन वर्षदेखि कोरोना महामारीका कारण ठप्प रहेको भक्तपुर जिल्लाको नगरकोटदेखि रानीकोटसम्मका होटल तथा रिसोर्टहरू विदेशी तथा आन्तरिक पर्यटकले भरिभराउ भएका छन् ।
सूर्यविनायक नगरपालिकाको गुण्डु र सिपाडोलको संगमस्थलमा रानीकोटका अधिकांश होटल नयाँ वर्षका लागि दुई साताअघिदेखि नै होटल बुकिङ भइसकेको पर्यटन व्यवसायी तथा भिलेज हाईल्याण्ड रिसोर्ट रानीकोटका सञ्चालक रामसुन्दर बाकेनले बताए ।
रानीकोटबाट काठमाडौं उपत्यका र भक्तपुर सहरको दृश्यबाहेक विभिन्न हिमशृङ्खलाको दृश्य पनि देखिन्छ। यो काभ्रेको सूर्यविनायक र पनौती नगरपालिकाको सिमानामा समुन्द्र सतहबाट २ हजार मिटरको उचाइमा अवस्थित छ ।
त्यसैगरी, घ्याम्पेडाँडा–रानीकोट पक्की सडक बनेपछि पर्यटकको आगमन ह्वात्तै बढेको होटल व्यवसायी तथा होटल घ्याम्पेडाँडाका प्रबन्धक निर्देशक कृष्ण प्रसाद अवालले बताए ।
पर्यटकको चाप बढेसँगै घ्याम्पेडाँडा रानीकोट क्षेत्रमा जिपलाइन सञ्चालनमा आएको छ भने ठूला होटल निर्माणको काम बढेको छ । आन्तरिक पर्यटकले भरिपूर्ण क्षेत्रमा हाल १४ वटा होटल सञ्चालनमा छन् ।
यसैबीच, नयाँ वर्ष मनाउन नगरकोटका होटल पनि तीन दिनका लागि खचाखच भरिएका छन् । नयाँ वर्षको पहिलो सूर्योदय हेर्न यहाँका होटल पर्यटकले खचाखच भरिएको होटल मेरिगोल्डका सञ्चालक गोकुल लामिछानेले बताए ।
नगरकोट जाने सडक निर्माण भएमा पर्यटन व्यवसाय फस्टाउँदै जाने लामिछानेले बताए ।
Published Date: 15 April 2023
