काठमाडौं, चैत २४ । महान्यायाधिवक्ता दिनमणि पोखरेलले राष्ट्रिय स्वतन्त्र पार्टीका अध्यक्ष रवि लामिछानेमाथिको राहदानी दुरुपयोगको मुद्दामा कारबाही अघि नबढाउने निर्णय राजनीतिक बार्गेनिङ र दबाबका कारण नभएको बताएका छन् ।
आफ्नो कार्यकालको सय दिन पूरा भएको अवसरमा शुक्रबार आयोजित एक कार्यक्रममा महान्यायाधिवक्ता पोखरेलले लामिछानेको मुद्दा प्रक्रियागत रुपमा टुंगिएको बताए ।
‘प्रक्रिया अनुसार अनुसन्धान सकियो । यसमा राजनीतिक बार्गेनिङ र दबाबको कुनै सरोकार छैन,’ उनले भने, ‘महान्यायाधिवक्ता राजनीतिक रूपमा नियुक्त भएकाले यो राजनीतिक मुद्दा हो भन्ने तपाईलाई लाग्न सक्छ। तर हामीले कानून र प्रक्रिया अनुसार मुद्दा नचलाउने निर्णय गर्यौं।
पोखरेलले लामिछानेको राहदानी विवादको सम्पूर्ण अनुसन्धान पूरा गरेर मात्रै फाइल बुझाउन भनिएको बताए । सोही अनुसार प्रहरीले सरकारी वकिलको कार्यालयमा प्रतिवेदन बुझाएको थियो ।
प्रहरी प्रतिवेदनका आधारमा सरकारी वकिलको कार्यालयले लामिछानेविरुद्धको राहदानी दुरुपयोग मुद्दामा कारबाही नगर्ने निर्णय गरेको थियो र सोही निर्णयलाई उच्च सरकारी वकिलको कार्यालय र महान्यायाधिवक्ताको कार्यालयले पनि सदर गरेको थियो ।
