काठमाडौं, चैत २२ । नेपाल टेलिकमले वीरगन्ज बाइपास सडकखण्डको फुटपाथको काम चैत २७ गतेभित्र सम्पन्न गर्ने प्रतिबद्धता जनाएको छ ।
नेपाल टेलिकमको प्रादेशिक निर्देशनालय वीरगन्जले चैत २७ गतेसम्म काम सम्पन्न गर्ने आश्वासन दिएपछि महानगरले मंगलबार आफ्नो परिसरमा फालिएको फोहोर उठाउन थाल्यो ।
बिहान टेलिकमका कर्मचारीले कार्यालयमा आएर लिखित जानकारी दिएपछि मेयर राजेशमान सिंहले सरसफाइ शाखालाई फोहोर उठाउन निर्देशन दिएका थिए ।
बिहान १० बजेअघि नै फोहोर जम्मा भइसकेको सरसफाइ व्यवस्थापन शाखाका अधिकृत सरफुदिन मियाले बताए ।
सडक र फुटपाथ मर्मतको काम फागुन मसान्तसम्ममा सम्पन्न गर्ने आश्वासन दिएपछि मङ्गलबार बिहान वीरगन्ज महानगरपालिकाले ७ वटा ट्रयाक्टर फोहोर दूरसञ्चार कार्यालय परिसरमा फालेको हो ।
फुटपाथको काम सम्पन्न गर्न कति समय लाग्ने भन्ने लिखित प्रतिवद्धता नआएसम्म महानगरले फोहोर नउठाउने अडान लिएको थियो ।
नेपाल टेलिकमका निमित्त निर्देशक अनन्तप्रकाश मल्लिकले ठेकेदारले माग गरेको समयबारे महानगरलाई जानकारी गराइएको बताए । ‘फुटपाथको कामका क्रममा महानगरले कुनै समन्वय नगरी फोहोर ल्याएर कार्यालय परिसरमा फालिदिएको हो, कानुनी शासन उल्लङ्घन भएको महसुस भएको छ’, उनले भने । ‘हामीले यसबारे महानगरलाई लिखित जानकारी गराएका छौं। त्यसपछि उनीहरुले फोहोर पनि उठाए ।”
निर्माण कम्पनीले थप १० जना कामदार राखेर कामलाई निरन्तरता दिने प्रतिबद्धता जनाएको उनले बताए ।
दूरसञ्चार कार्यालय मार्फत पिनस बाँके जेभीले गण्डकचोकदेखि रजत जयन्ती चोक मार्गमा ट्रेन्चिङ, डकरिङ र बल्जिङ गर्ने क्रममा इन्टरलक ब्लकसहित फुटपाथमा ड्रग अप गरेको थियो ।
जेभीका सञ्चालक भरतबहादुर कार्कीले मंगलबार नेपाल टेलिकमलाई फुटपाथ मर्मतको काम चैत १० गतेसम्म सम्पन्न हुने जानकारी दिए ।
महानगरपालिकाको कदमपछि दबाबमा परेको टेलिकमले बुधबार बिहानैदेखि अलपत्र सडक र फुटपाथ मर्मत गर्न थालेको मेयर राजेशमान सिंहले बताए ।
