काठमाडौं, चैत २० । नेपाल आयल निगमले पेट्रालियम पदार्थको मूल्य घटाएको छ । निगमले सोमबार मध्यरातिबाट लागू हुनेगरी पेट्रोलमा प्रति लिटर ३ तथा डिजेल र मट्टीतेलमा प्रति लिटर १० रुपैयाँले घटाउने निर्णय गरेको हो ।
निगम सञ्चालक समितिको बैठकको निर्णय अनुसार पेट्रालियम पदार्थको मूल्य घटाइएको निगमका प्रवक्ता मनोज कुमार ठाकुरले जानकारी दिए । मूल्य घटेसँगै पेट्रोलको खुद्रा बिक्री मूल्य प्रति लिटर १ सय ७५ रुपैयाँ तथा डिजेल र मट्टीतेल १ सय ६५ रुपैयाँ कायम गरिएको छ । एलपी ग्यासको खुद्रा बिक्री मूल्यमा अझै पनि प्रति सिलिण्डर ५४५ रुपैयाँ घाटा रहेको भन्दै हाललाई मूल्य यथावत राखिएको निगमले जनाएको छ । हवाई इन्धन आन्तरिकतर्फ १० रुपैयाँ तथा बाहृयतर्फ प्रति लिटर ७० अमेरिकी डलर घटाइएको निगमले जनाएको छ ।
नयाँ मूल्यसूची अनुसार पेट्रोलमा प्रतिलिटर १ रुपैयाँ ८६ पैसा र डिजेलमा ६ रुपैयाँ ८२ पैसा घटेर आएको थियो । आईओसीले मार्च १५ मा पठाएको मूल्यमा पेट्रोलमा ८६ पैसा र डिजेलमा १ रुपैयाँ ५० पैसा घटेर आएको थियो ।
