भक्तपुर, कात्तिक २१ । उर्वरभूमि कृषि सहकारी संस्था लिमिटेड, जगाती भक्तपुरले नेपाल संवत् न्हुँदः ११४७, शुभदीपावली (तिहार) तथा छठ पर्व २०८३ को अवसरमा आफ्ना सदस्यहरूलाई निःशुल्क काउलीका बेर्ना वितरण गरेको छ ।
संस्थाको आयोजनामा सम्पन्न कार्यक्रममा १५० जना सदस्यलाई प्रतिव्यक्ति १०० वटाका दरले कुल १५ हजार काउलीका बेर्ना वितरण गरिएको हो ।
संस्थाका अध्यक्ष राकेश सुकुपायोको सभापतित्वमा सम्पन्न कार्यक्रममा अध्यक्ष सुकुपायोले संस्थाले सञ्चालन गर्दै आएका विभिन्न गतिविधिबारे जानकारी गराउँदै काउलीका बेर्ना वितरण गर्नुको उद्देश्य स्पष्ट पारे ।
सदस्यहरूलाई कृषि उत्पादनमा प्रोत्साहन गर्ने, तरकारी खेतीप्रति आकर्षित गर्ने तथा घरायसी र व्यावसायिक तरकारी उत्पादनमा सहयोग पुर्याउने उद्देश्यले कार्यक्रम आयोजना गरिएको उनले बताए । यसले स्थानीय कृषि क्षेत्रको प्रवर्द्धनमा समेत योगदान पुर्याउने उनको भनाइ थियो ।
सहकारीको मूल मर्मअनुरूप पारस्परिक सहयोग, विश्वास, एकता र सामूहिक प्रयासमार्फत कृषि क्षेत्रको विकास, आर्थिक समृद्धि तथा आत्मनिर्भर समाज निर्माण गर्ने अभियानलाई आगामी दिनमा पनि निरन्तरता दिने अध्यक्ष सुकुपायोले बताए ।
कार्यक्रममा संस्थाका उपाध्यक्ष नारायणप्रसाद मचामसीले सदस्यहरूको आवश्यकता र हितलाई प्राथमिकतामा राखेर संस्थाले विभिन्न सदस्यकेन्द्रित तथा उत्पादनमूलक कार्यक्रम सञ्चालन गर्दै आएको बताए ।
आगामी दिनमा पनि यस्ता कार्यक्रमलाई निरन्तरता दिँदै सदस्यहरूको आर्थिक तथा सामाजिक जीवनस्तर उकास्न संस्था क्रियाशील रहने उनले बताए ।
सहकारीले सदस्यहरूलाई उत्पादनमूलक कृषि गतिविधिमा जोड्ने उद्देश्यसहित काउलीका बेर्ना वितरण कार्यक्रम सञ्चालन गरेको हो ।
