भक्तपुर, चैत १३ । नेपाल मजदुर किसान पार्टीका अध्यक्ष नारायणमान विजुक्छेंले सोमबार एक सय १५ जना जेष्ठ नागरिकहरुलाई सम्मान गरेको छ । सिद्धि गणेश वचत तथा ऋण सहकारी संस्था लिमिटेड चोर्चा भक्तपुरको आयोजनामा भएको जेष्ठ सदस्य सम्मान कार्यक्रममा अध्यक्ष विजुक्छेंले संस्थामा आवद्ध जेष्ठ नागरिकहरुलाई दोसल्ला ओढाई सम्मान गरेको हो । संस्थाले प्रत्येक वर्ष संस्थामा आवद्ध ७० वर्ष नाघेका बृद्धबृद्धाहरुलाई वर्षमा एकपटक यसरी नै सम्मान गर्दै आएको छ ।
कार्यक्रममा प्रमुख अतिथि विजुक्छेंले बृद्धबृद्धाहरुको उचित स्याहारसुसारका लागि आदर निकेटनको आवश्यकताबारे चर्चा गरे । अहिले परिवारका सदस्यहरु सवैजना व्यस्त रहने भएकाले परिवारका जेष्ठ नागरिकहरुलाई उचित स्याहारसुहार गर्ने समस्या भएको भन्दै जेष्ठ नागरिकहरुको उचित स्याहारसुसारका लागि आदर निकेतन सञ्चालन गर्नुपर्नेमो जोड दिएका थिए ।
जेष्ठ नागरिकहरुलाई आफनो स्वास्थ्यप्रति गम्भीर हुन सचेत गराउंदै चिकित्कसको सल्लाह अनुसार अगाडि वढ्न सल्लाह दिए । उनले आआफनो स्वास्थ्यप्रति सम्वेदनशिल भई औषधि उपचार गर्न, रोग लागिसकेपछि तुरुन्त स्वास्थ्य संस्थामा पुगेर उपचार गराउन हुन बताए ।
कार्यक्रममा ख्वप अस्पताल च्याम्हासिंह भक्तपुरका संयोजक डा रत्नसुन्दर लासिवाले सहभागी जेष्ठ नागरिकहरुलाई स्वास्थ्य हेरविचारका विभिन्न पक्षहरुबारे जानकारी गराएका थिए । समयमै उपचार गरे रोगको निदान हुने भन्दै यसतर्फ सवैजना जेष्ठ नागरिकहरुलाई सचेत रहन आग्रह गरेका थिए ।
संस्थाका अध्यक्ष रुद्रनारायण लाखाको अध्यक्षतामा भएको कार्यक्रममा उपाध्यक्ष विष्णुराम दुमरुले स्वागत गरेका थिए । कार्यक्रम संस्थाका सचिव विष्णुप्रसाद दुमरुले सञ्चालन गरेका थिए ।
संस्थाले २०६९ सालबाट जेष्ठ नागरिक सम्मान कार्यक्रम सुरु गरेको थियो । वर्षमा एक पटक गरी गतवर्षसम्म ६ सय ७१ जेष्ठ नागरिकलाई सम्मान गरिसकेको कार्यक्रममा जानकारी दिए । सोमबार थप एक सय १५ जनालाई सम्मान गरिएको थियो ।