काठमाडौं, फागुन २६ । माओवादीका विभिन्न समूहका शीर्ष नेताहरुको संयुक्त बैठकले फागुन ३० गते संयुक्त पत्रकार सम्मेलन र अन्तरक्रिया गर्ने निर्णय गरेको छ ।
प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्डको अध्यक्षतामा प्रधानमन्त्रीको सरकारी निवास बालुवाटारमा बैठक बसेको हो । सर्वोच्च अदालतले प्रधानमन्त्री दाहालविरुद्ध मुद्दा चलाउन आदेश दिएपछि बैठक बसेको हो ।
बैठकमा माओवादी केन्द्रका अलावा बाबुराम भट्टराई नेतृत्वको नेपाल समाजवादी पार्टी, मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेकपा, धर्मेन्द्र बाँस्तोला नेतृत्वको नेकपा (बहुमत) र वैज्ञानिकहरु सहभागी थिए । विश्वभक्त दुलाल आहुती नेतृत्वको समाजवादी कम्युनिष्ट पार्टी र कर्णजित बुढाथोकी नेतृत्वको नेकपा (माओवादी समाजवादी)को पनि सहभागिता थियो।
