चितवन, फागुन १८ । प्रहरीले रु एक करोड १० लाखको सुन र हिराका गरगहनासहित तीन भारतीय नागरिकलाई पक्राउ गरेको छ ।
उनीहरुलाई बुधबार बिहान ६३ दशमलव ८९८ तोला सुन र २२ दशमलव ८७८ तोला हीराका गरगहनासहित पक्राउ गरिएको हो । भारतीय दर्ता नम्बर (WB12AV5566) को गाडीमा लुकाएर कोलकाताबाट काठमाडौं ल्याइएका सुन र हिराका गहना प्रहरीले बरामद गरेको छ ।
जिल्ला प्रहरी कार्यालय चितवनले बुधबार एक प्रेस विज्ञप्ति जारी गर्दै पक्राउ परेका भारतीय नागरिक र गरगहना सार्वजनिक गरेको हो । पक्राउ पर्नेमा उत्तर प्रदेशको बलिया जिल्लाका ४२ वर्षीय विनोद प्रसाद, पश्चिम बङ्गालको हौडा जिल्लाका ५१ वर्षीय गणपतकुमार तोसौर र ४२ वर्षीय नरेश वर्मा रहेको जिल्ला प्रहरी कार्यालयका प्रमुख रामेश्वर कार्कीले जानकारी दिए ।
पक्राउ परेकाहरुलाई बरामद गरगहनासहित राजस्व अनुसन्धान विभागमा पठाइने छ ।
यस्तै कार्यालयले खैरहनी नगरपालिका–६ बाट प्रतिबन्धित खोकी सिरप कोरेक्स ३३ बोतलसहित तीन जनालाई पक्राउ गरेको छ । पक्राउ पर्नेमा भरतपुर महानगरपालिका–१२ का ४० वर्षीय सुरजकुमार शाही, ३६ वर्षीय प्रकाश गौतम र भरतपुर–२ का ५० वर्षीय शैलेन्द्र श्रेष्ठ रहेका छन् ।
