चितवन, फागुन १२ । चितवनमा जङ्गली हात्तीको आक्रमणबाट आज (शुक्रबार) एक विदेशी नागरिकको मृत्यु भएको छ । घटना दिउँसो १२:३० बजे भएको थियो।
चितवन राष्ट्रिय निकुञ्जको सदरमुकामबाट करिब ६ सय मिटर टाढा सौराहामा गोविन्दे नामको जंगली हात्तीको आक्रमणमा परी एक इजरायली नागरिकको मृत्यु भएको छ । मृतकसँग इजरायली ड्राइभिङ लाइसेन्स रहेको प्रहरीले जनाएको छ ।
जिल्ला प्रहरी कार्यालय चितवनले पीडितको नाम स्यामुएल बोक्नर रहेको लाइसेन्स बरामद गरेको जिल्ला प्रहरी कार्यालय चितवनले जनाएको छ । विदेशीले टिकट नलिई एक्लै पार्कमा प्रवेश गरेको खुलेको छ । यसबारे थप अनुसन्धान भइरहेको पार्कले जनाएको छ ।
चालु आर्थिक वर्षको ६ महिनामा चितवन राष्ट्रिय निकुञ्जमा वन्यजन्तुको आक्रमणबाट आठ जनाको मृत्यु भएको छ । तीमध्ये हात्तीको आक्रमणबाट दुई जनाको मात्रै मृत्यु भएको छ । केही दिनअघि मात्र निकुञ्जमा हात्तीको आक्रमणबाट ६४ वर्षीया महिलाको मृत्यु भएको थियो भने गत महिना हात्तीको आक्रमणबाट भरतपुर महानगरपालिकामा ७० वर्षीया वृद्धाको मृत्यु भएको थियो ।
Published Date: 24 February 2023
