काठमाडौं, फागुन १२ । नेपाल नागरिक उड्डयन प्राधिकरणले गर्मीको समय तालिका अघि नै बक्यौता तिर्न वायुसेवा कम्पनीहरुलाई निर्देशन दिएको छ ।
एयरलाइन्सबाट अनुमानित बक्यौता रकम उठाउन नसकेपछि प्राधिकरणले बिहीबार एयरलाइन्सलाई पत्र लेखेर बक्यौता तिर्न निर्देशन दिएको हो ।
प्राधिकरणले नेपाल वायुसेवा निगम लगायत निर्धारित आन्तरिक उडान सञ्चालन गर्ने सबै वायुसेवा कम्पनीलाई पत्र जारी गरेको हो । जसमा बुद्ध एयर, यती एयरलाइन्स, श्री एयरलाइन्स, समिट एयर, तारा एयर, गुण एयर, सीता एयर र सौर्य एयरलाइन्स रहेका छन् ।
प्राधिकरणले सबै एयरलाइन्सलाई गर्मीको समयतालिका फेब्रुअरी २८ सम्म बुझाउन निर्देशन दिएको छ। विभिन्न विमानस्थलमा सञ्चालन हुने सेवाको बक्यौता पनि ग्रीष्मकालीन समयतालिका पेस गर्नु अघि ३१ डिसेम्बर २०२२ भित्र स्पष्ट गरिसक्नु पर्ने भनेको छ।
हेलिकप्टर कम्पनीहरूले उडान अनुमति लिनु अघि बक्यौता तिर्नुपर्छ।
प्राधिकरणले बिहीबार सबै हेलिकप्टर कम्पनीलाई पत्र पनि पठाएको छ । नागरिक उड्डयन प्राधिकरणले हेलिकप्टर कम्पनीलाई प्रधान कार्यालयबाट उडान अनुमति लिनुअघि नै विमानस्थलको बक्यौता बुझाउन निर्देशन दिएको छ ।
क्यानका अनुसार ३१ डिसेम्बर २०२२ सम्ममा बुझाउनुपर्ने सम्पूर्ण रकम बुझाएपछि मात्र उडान अनुमति दिइनेछ ।
