काठमाडौं, फागुन ११ । नेपालका प्रथम रक गायक माइक खड्काको बिहीबार ललितपुरस्थित आफ्नै निवासमा निधन भएको छ । उनी ६९ वर्षका थिए ।
उनको आजै पशुपति आर्यघाटमा अन्तिम संस्कार गरिने भएको छ । उनको वास्तविक नाम मुकुन्दकुमार खड्का भए पनि उनको स्टेजको नाम माइक खड्का थियो ।
निर्देशक तथा रेडियो व्यक्तित्व प्रकाश सायमीले खड्काको निधनले नेपाली सांगीतिक क्षेत्रमा ठूलो क्षति पुगेको बताए । उनले खड्कालाई नेपालको एल्विस प्रेस्ली भनिने पनि बताए । खड्का नेपाली, हिन्दी र अङ्ग्रेजी सङ्गीतका जानकार पनि हुन् ।
खड्लाले ओमविक्रम विष्ट, अरुण थापा र दिव्या खालिङजस्ता गायकसँग सहकार्य गरेका थिए । केही अङ्ग्रेजी गीत रेकर्ड गरे पनि एल्बम निकाल्न सकेनन् । उनले फ्रिडमसँग पनि सहकार्य गरे, जुन देशको सबैभन्दा पुरानो म्युजिकल ब्यान्ड मानिन्छ।
पछिल्लो समय उनी संगीतमा किताब लेख्ने तयारीमा थिए । उनी क्लासिक एफएमका निर्देशक पनि थिए। उनले सोही एफएममा कार्यक्रम पनि सञ्चालन गरेका थिए । स्वर्गीय खड्काका श्रीमती र एक छोरा रहेका छन् ।
