काठमाडौँ, फागुन ६ । अरनिको राजमार्ग अन्तर्गत बनेपामा टिपरले स्कुटरलाई ठक्कर दिँदा एक जनाको ज्यान गएको छ।
बनेपाको चाँदनी चोकमा आज बिहान भएको दुर्घटनामा स्कुटर चालकको घटनास्थलमै मृत्यु भएको प्रहरीले जनाएको छ। उक्त दुर्घटनामा अर्का एक जना घाइते भएका छन्। घाइतेको अवस्था बारे थप विवरण आउन बाँकी रहेको छ।
प्रहरीका अनुसार बागमती प्रदेश ०१००४ क ३४२३ नम्बरको टिपरले बागमती प्रदेश ०२–०६३ प ९१८९ नम्बरको स्कुटरलाई ठक्कर दिएको थियो।
दुर्घटनापछि आक्रोशित स्थानीय बासिन्दाले टिपरमा आगजनी गरेका छन्। घटनापछि क्षेत्र तनावग्रस्त बनेको छ भने अवस्था नियन्त्रणमा लिन प्रहरी परिचालन गरिएको छ।
दुर्घटनाबारे थप अनुसन्धान भइरहेको प्रहरीले जनाएको छ।
Published Date: 18 February 2026
