काठमाडौँ, माघ २८ । आगामी फागुन २१ गते हुने प्रतिनिधिसभा सदस्य निर्वाचनका लागि हिमाली जिल्ला मुस्ताङमा कूल ३९ वटा मतदान केन्द्र तथा मतदानस्थल तोकिएका छन्। जिल्लाका पाँच स्थानीय तहमा सबैभन्दा कम मतदाता वारागुङ मुक्तिक्षेत्र–३ समरस्थित समर आधारभूत विद्यालय मतदान केन्द्रमा ३६ जना रहेका छन् भने सबैभन्दा बढी घरपझोङ गाउँपालिका–४ जोमसोमको जनहित मतदान केन्द्रमा ६८९ जना मतदाता छन्।
जिल्ला निर्वाचन कार्यालयका अनुसार विसं २०७९ को निर्वाचनपछि मतदाता नामावली अद्यावधिक हुँदा मुस्ताङमा कूल ११ हजार ३२८ मतदाता कायम भएका छन्। पालिकागत रूपमा घरपझोङमा २,४९२, थासाङमा २,९०७, लोघेकर दामोदरकुण्डमा १,५४२, वारागुङ मुक्तिक्षेत्रमा २,३७६ र लोमान्थाङमा २,०११ मतदाता छन्।
निर्वाचन आयोगले बदर मत घटाउन मतदाता शिक्षा कार्यक्रम सञ्चालन गर्ने भएको छ। जिल्ला निर्वाचन अधिकारी लोकेन्द्र ज्ञवालीका अनुसार स्थानीय तहले सिफारिस गरेका व्यक्तिलाई प्रशिक्षक तालिम दिएपछि जिल्लाका सबै २५ वडामा मतदाता शिक्षा कार्यक्रम अघि बढाइनेछ।